Miss Universe 2025-ийн титмийг Мексикийн Фатима Бош (Fátima Bosch) авсан байна.  Энэ тэмцээн 74-р удаагийнх бөгөөд Тайландын Бангкокт зохион байгуулагдсан билээ. 

Гэвч энэ жилийн тэмцээн гоо үзэсгэлэнгээс илүү маргаан, дуулиан шуугиан, уналтаараа олон улсын хэвлэл мэдээллийн гол сэдэв болов.

Тэмцээний үеэр хамгийн их шуугиан тарьсан үйл явдал бол "Miss Universe" байгууллагын Гүйцэтгэх захирал Науат Итсарагрисил Мексикийн мисс Фатима Бошийг олон нийтийн өмнө “dumbhead” /тэнэг толгой/ гэж доромжилсон явдал байв. Энэ үйл явдал шууд дамжуулалтын үеэр болсон ба Мисс Мексик болон бусад хэд хэдэн оролцогч эсэргүүцэл илэрхийлж танхимаас гарч, бойкот зарласан юм. Маргаан улмаар улс төрийн түвшинд хүрч, Мексикийн Ерөнхийлөгч хүртэл Фатимаг дэмжиж мэдэгдэл хийжээ. Науат Итсарагрисил дараа нь уйлах шахам уучлалт гуйсан боловч энэ нь шүүмжлэлийн галыг намжаагаагүй.

Шүүгчдийн талд ч асуудал гарсан. Шүүгч Омар Харфуч тэмцээний үеэр албан ёсоор шүүгчийн бүрэлдэхүүнээс гарч, “нууц хороо” шилдэг 30-ыг шүүн, тэдний дунд оролцогчтой романтик харилцаатай хүн байсан гэж мэдэгдсэн. Miss Universe байгууллага эдгээр мэдэгдлийг няцаасан ч олон нийтийн дунд эргэлзээ үлдсэн хэвээр байна.

Тайзан дээр ч элдэв гэнэтийн зүйл тасраагүй. Мисс Ямайка Габриэль Генри гоёлын даашинзтай үзүүлбэрийн үеэр тайзнаас унаж, эмнэлэгт хүргэгдсэн. Мөн Их Британийн төлөөлөгчийн нэг оролцогч тайзнаас халтирч унасан тохиолдол ч гарсан бөгөөд энэ нь тэмцээний аюулгүй байдлын талаар нэмэлт шүүмжлэл дагуулсан.

Энэ бүхний эцэст Фатима Бош титмийг авсан бөгөөд түүний тэсвэр, шударга ёсны төлөөх байр суурь тэмцээний хамгийн том бэлгэдэл болж үлдлээ. Олон нийт энэ удаагийн "Miss Universe" тэмцээнийг “гоо сайхны” бус “дүрэм, ёс зүй, хүндлэл”-ийн тухай хэлэлцүүлгийг нээсэн жил гэж тодорхойлоод байна.

Эх сурвалж: Yahoo, Dailymail, Wikipedia, CNN