МАН-ын Бага хурал Тусгаар тогтнолын ордонд эхэлж,  хуралдаанд оролцох 429  гишүүний ирц 80 хувьтай бүрдсэн байна.

Бага хурлын VIII хуралдааны даргаар УИХ-ын МАН-ын бүлгийн дарга Ж.Бат-Эрдэнэ, дэд даргаар УИХ-ын гишүүн Д.Гангамөрөн ажиллах юм.

Хурлын үеэр Л.Оюун-Эрдэнэ намын даргын үүрэгт ажлаа өгч, бага хурлын 48 гишүүнийг чөлөөлж, шинээр сонгох, намын их хурлын товыг тогтоох, төлөөлөгчдийг сонгох зэрэг асуудлыг хэлэлцэх аж.

МАН-ын 8-р бага хурал үргэлжилж байна. Нийт гишүүдийн ирц 90 хувьд хүрчээ. Намын даргад нэр дэвшсэн хоёр өрсөлдөгч илтгэл тавьж дуусжээ. Хурал түр завсарлаад байна.  Мэтгэлцээн дууссан тул Бага хурлын гишүүд саналаа хэлнэ. Нэг хүнд гурван минутын хугацаа өгчээ. Дараа нь санал хураалтыг хаалттай явуулах юм.     

Энэ удаагийн Бага хуралд УИХ-д жагсаалтаар гишүүн болж, хууль тогтоогч  болсон гишүүдийг оруулснаараа онцлог юм. Эдгээр хүмүүс намын анхан шатны байгууллагад ажиллаж байгаагүй, анхан шатны гишүүдээ дэмждэггүй, хамтран ажилладаггүй тул намын Бага хурлын гишүүн байхыг зарим гишүүн дэмжээгүй байна. Тус нам Бага хурлын гишүүдээ томилохдоо таван бүлгийн төлөөллийг тэнцүү багтаахаар дүрэмдээ тусгасан. Эдгээр нь 

-Эмэгтэй гишүүд
-Залуу гишүүд
-Бизнесийн төлөөлөл
-Улс төрчид буюу УИХ-ын гишүүд
-Ахмад гишүүд юм.