Ерөнхийлөгч У.Хүрэлсүхийн санаачлан хэрэгжүүлж буй “Илгээлт 2100” хөтөлбөрийн хүрээнд 2025-2026 оны хичээл жилд 32 суралцагчдыг Бүгд Найрамдах Турк Улсын их, дээд сургуулиудад компьютерийн шинжлэх ухаан, архитектор, хиймэл оюун ухаан, өгөгдлийн инженер зэрэг мэргэжлээр илгээнэ.

Эдгээр суралцагчдыг Бүгд Найрамдах Турк Улсаас Монгол Улсад суугаа Онц бөгөөд Бүрэн эрхт Элчин сайд Башак Генч Юксел Монгол Улсын Ерөнхийлөгчийн Гадаад бодлогын зөвлөх Э.Одбаяр нар Улаанбаатар хот дахь Элчин сайдын яаманд хүлээн авч уулзан, сурлагын амжилт хүсэж, оюутны визийг гардуулан өглөө.

Энэ тэтгэлгийн онцлог нь ЭЕШ-ийн оноогоороо автомат сонгон шалгаруулалтаар тэнцдэг. Сурагчид өөрсдөө хүсэлт гаргадаггүй. Боловсролын үнэлгээний төв, Улсын бүртгэлийн ерөнхий газрын мэдээллийн санг ашиглан холбогдох журмын шалгуурын дагуу болзол хангасан сум, хороо бүрийн Элсэлтийн ерөнхий шалгалтын оноогоороо тэргүүлсэн шилдэг төгсөгчдийн жагсаалтыг Боловсролын үнэлгээний төв гаргадаг.

Автоматаар шүүж гаргасан жагсаалтыг Нийслэлийн боловсролын газар, аймгуудын Боловсрол, шинжлэх ухааны газраар баталгаажуулан ирүүлсэн Боловсролын яамны 1/3817 тоот албан бичгийг үндэслэн хүүхдүүдийн нэрийг зарладаг. Гол шалгуур нь математик, гадаад хэлний дундаж оноогоор сум, хороондоо нэгдүгээрт жагсах юм.

Тэтгэлгийн журмыг эндээс уншина уу.