Гадаад харилцааны яамны Төрийн нарийн бичгийн дарга Л.Мөнхтүшиг Канад Улсаас Монгол Улсад суух Элчин сайд Стивен Достыг хүлээн авч уулзан, итгэмжлэх жуух бичгийн хуулбарыг нь хүлээн авав.

Уулзалтын эхэнд Төрийн нарийн бичгийн дарга Л.Мөнхтүшиг Иж бүрэн түншлэлийн түвшинд хөгжиж байгаа Монгол, Канадын харилцааг эдийн засгийн агуулгаар баяжуулах, дээд, өндөр түвшний айлчлалын давтамжийг хадгалахад ач холбогдол өгч байгаагаа онцлоод Элчин сайдыг үүрэгт ажилдаа албан ёсоор орж байгаад нь баяр хүргэв. 

Элчин сайд Стивен Дост Монгол Улсад Элчин сайдаар томилогдон ирж байгаадаа баяртай байгаагаа илэрхийлээд, хоёр улсын харилцааг улс төр, худалдаа, эдийн засаг, уул уурхай болон хүмүүнлэгийн салбарт өргөжүүлэхэд хүч чармайлт гарган ажиллахаа тэмдэглэв.

Эх сурвалж: ГХЯ