Гэрээс гараагүй байхад та тийм замаар яваад, замын хөдөлгөөний дүрэм зөрчлөө гэсэн хиймэл оюун ухааны торгуулийн мессэж 30 минутын зайтай хоёр ирэв. Маргааш нь ажил дээрээ сууж байхад “та тэрүүгээр яваад, тийм дүрэм зөрчлөө” гэсэн торгуулийн зурвас гар утсанд дахин ирэв. Замын хөдөлгөөнд оролцоогүй байхад торгууль ирээд байгаагийн шалтгааныг тодруулахаар Замын хөдөлгөөний удирдлагын төв рүү холбогдлоо.

Тус төвийн албаны дарга дээрх зурвас ирсэн өдөр, цагийн дагуу камерыг шүүж үзээд, гомдол гаргасан иргэн биш, 3635 улсын дугаартай бага оврын ачааны машин дээрх зөрчлүүдийг гаргасан болохыг тогтоов.

Хяналтын ухаалаг камерууд одоогийн байдлаар автомашины зөвхөн дугаар уншиж таньж байгаа. Бохирдолтой дугаарууд болон А, Д үсгийн тэмдэглэгээ ойролцоо тохиолдолд буруу таних зэрэг асуудал гарч байна.

Жишээлбэл, Дээрх зөрчил гаргасан машины улсын дугаар 3635 УБ... байхад 9635УБ... дугаарт торгуулийн зурвас ирсэн байна. Камер шүүж үзэхэд 3635 дугаарынх нь эхний 3-ын тооны өмнө дугаар тогтоосон боолт байгаагаас 3-ын тоог 9-ийн тоотой андуурч таньсан байна.

Дээрхээс гадна шавар усанд бохирдсон, улсын дугаар нь хуучирч муудсан, эсвэл дугаар цохиж байгаа байгууллагууд жишээ нь, А, Д үсгийг стандарт бусаар цохисонтой холбоотой А-гаар танигдсан, Л, П үсгийг стандарт бусаар цохисонтой холбоотой буруу танигдсан зэрэг гомдол гарч байна.

-Ийм асуудал хэр их гарч байна вэ?
-Иргэдээс ирж буй дуудлага, гомдлын 80 хувь нь дугаар буруу таньсантай холбоотой байна. Бид үүнийг удирдлагууддаа танилцуулж байна. Зөвхөн иргэдээс ирсэн мэдээлэлд үндэслэн шалгахад ийм зөрчлүүд гарч байна.

-Энэ зөрчлийг арилгах чиглэлээр ямар арга хэмжээ авч байна вэ?
-Зөвхөн улсын дугаарт үндэслэн торгох биш, машины өнгө, марк, улсын дугаартай нь тулгаж, хариуцлага тооцвол ийм асуудал багасна. Тэгэхээр албан ёсоор торгож эхлэхээс өмнө энэ мэт асуудлыг шийдэхгүй бол хүмүүсийг хохироох асуудал үүсэхээр байгаа тул бид удирдлагууддаа уламжилж байна.  

-2026 оны 1-р сарын 1-нээс ухаалаг системээр торгож эхэлнэ гэж хотын дарга мэдэгдсэн шүү дээ. Үүнээс өмнө сайжруулалт хийж амжих уу?
-Одоогоор зөвхөн эрх бүхий албан тушаалтан камерын торгуулийг давхар хянасны дараа торгууль болгон жолоочид илгээж байна. Ухаалаг системээр торгох эрх зүйн орчин Монгол Улсад бүрдээгүй байна. Энэ бүхнийг шийдвэрлэж зохицуулалт хийсний дараа албан ёсоор торгож эхлэх байх.  Тэгэхээр ухаалаг системээр хэзээ торгож эхлэх нь одоогоор тодохойгүй байна гэв.