Засгийн газрын ээлжит бус хуралдаанд 2024 оны 12-р сарын 20-ны баасан гарагт боллоо. Хуралдааны дараа Ерөнхий сайд Л.Оюун-Эрдэнэ мэдээлэл хийсэн юм.

Ерөнхий сайд, Улаанбаатар хотын агаарын бохирдлын асуудлыг өвөл ярьж, хавар мартдаг байж болохгүй. Нийслэлийн асуудлыг нийслэл өөрөө шийдэх санхүүгийн чадвартай байх ёстой гэсэн байр суурийг Засгийн газар баримталж байна.

Улаанбаатар хотын агаар, хөрсний бохирдол, эрчим хүчний дутагдал гамшгийн түвшинд хүрснийг бүх нийтээрээ хүлээн зөвшөөрөх ёстой. Тиймээс өнөөдөр өндөржүүлсэн бэлэн  байдлын зэрэгт шилжүүлсэн.

Улаанбаатар хотын тулгамдсан асуудлыг УИХ-тай хамтарч шийдэхийн тулд эрх зүйн тусгай орчин шаардлагатай гэж үзэж байна. Үүнийг ирэх 7 хоногийн даваа гарагаас УИХ-д танилцуулна.

Улаанбаатар хотын эрх зүйн асуудал бараг 50 гаруй салангид хуулиар зохицуулагддаг. Түгжрэл, агаарын бохирдол бол гамшиг юм гэж үзэж, гамшгийн түвшинд авч үзэж байна. Шийдлүүдийг гаргасан. Энэ бүхнийг хэрэгжүүлэхэд их хэмжээний санхүүгийн эх үүсвэр шаардагдана. Газар чөлөөлөлтөөс эхлээд олон нийттэйгээ ойлголцох шаардлага үүснэ. Хатуухан арга хэмжээ авахыг хэлэх нь зүйтэй юм.

Засгийн газрын бодлогын хүрээнд ААН-үүд борлуулалтын орлогынхоо 1 хувийг нийгэмд тустай зарим үйлчилгээнд дэмжлэг үзүүлбэл тэр 1 хувийг татварыг авахгүй үлдээх эрх зүйн зохицуулалттай. Хэрэв ААН-үүд хүсвэл 2024 оны IV улирал, 2025 оны турш татварын нэг хувийг агаар, хөрсний бохирдлын асуудлыг шийдэхэд зарцуулах боломжтойгоор шийдвэрлэлээ. Тэгэхээр 1 их наяд орчим төгрөгийн хөрөнгийг агаарын бохирдлын эсрэг зарцуулах боломж байна. 

Агаарын бохирдлыг бууруулах, чанарыг сайжруулах, хүн амын эрүүл мэндийг хамгаалах зорилгоор нийслэлийн хэмжээнд засаг захиргаа, нутаг дэвсгэрийн нэгж, төрийн болон нутгийн захиргааны байгууллагыг өнөөдрөөс буюу 2024 оны арванхоёрдугаар сарын 20-ноос 2025 оны гуравдугаар сарын 1-нийг хүртэлх хугацаанд өндөржүүлсэн бэлэн байдлын зэрэгт шилжүүллээ.