#PUBGMobile өнгөрсөн жилийн аварга IHC Esports баг дэлхийн аварга шалгаруулах тэмцээнээс хасагдлаа. Харин өмнөх тэмцээний дэд байр Falcons Force дараагийн шатанд шалгарав.

PUBG Mobile-ын дэлхийн аварга шалгаруулах тэмцээн буюу 3 сая ам.долларын шагналын сантай "PUBG Mobile Global Championship 2024" Малайзын Куала Лумпур хотод үргэлжилж байна.

Тэмцээний хоёр дахь долоо хоногт "Улаан" хэсгийн тоглолтууд болж Монголын "Falcons Force", "IHC Esports" багууд оролцлоо.

Улаан хэсэгт дэлхийн шилдэг 16 баг дөрвөн өдрийн турш өдөрт 6, нийт 24 map тоглосноос Falcons Force 168 оноотойгоор 5-р байр эзэлж "Survival Stage" шатанд шалгарлаа.

Харин IHC Esports 106 оноотой 12-р байраар тэмцээнээ дуусгаж 22 мянган ам.доллартай (75 сая төгрөг) гэртээ харив.

Улаан хэсгийг Украины "Natus Vincere", Ойрх Дорнодын "Nigma Galaxy", Хятадын "Tong Jia Bao Esports" багууд тэргүүлж финалд оролцох эрхээ шууд авсан бол 4-11-р байрт орсон найман баг финалд шалгарахын төлөө Survival Stage-д тоглох болно.

• Falcons Force, IHC Esports багууд дэлхийн аваргын тоглолтоо маргааш эхлүүлнэ
• АРВАННЭГДҮГЭЭР САРЫН СПОРТ: Электрон спортын дэлхийн аваргууд болно
• Монголын "4Merical Vibes" баг хоёр дахь удаа Төв, Өмнөд Азийн аварга боллоо

Ирэх долоо хоногт "Ногоон" хэсгийн тоглолтууд эхлэх бөгөөд Монголын "Stalwart Esports", "4Merical Vibes" багууд тоглоно.

Өмнөд Азийн оноогоор дэлхийн аваргад оролцох эрхээ авсан "Falcons Force" нь Саудын Арабын багийн нэр дээр тоглодог бөгөөд өнгөрсөн жил харамсалтайгаар дэд байр эзэлсэн. Тэд энэ жил багийн бүрэлдэхүүндээ "4Merical Vibes" багт тоглож байсан Мөнхболдын "EAST" Батмөнхийг нэгтгэж таван хүний бүрэлдэхүүнтэй оролцож байна.

Харин өнгөрсөн жилийн аварга "IHC Esports" сонгон шалгаруулалтаас эрхээ авч чадаагүй ч тусгай урилгаар Малайзад ирсэн. Аваргууд өмнөх бүрэлдэхүүнээс Хатанбаатарын "Alex" Хүсэлбаатарыг чөлөөлж сэлгээнээс "ROGUE" Б.Хүслэнг гараанд гаргаад байсан билээ.