Засгийн газрын хуралдааны шийдвэрийг танилцуулж байна. 

ЗГХЭГ-ын дарга Н.Учрал, Засгийн газрын өнөөдрийн хуралдаанаар Үндэсний баялгийн сангийн тухай хуулийг хэрэгжүүлэх чиглэлээр авч хэрэгжүүлж буй ажлын танилцуулга хийлээ. Стратегийн 16 орд, стратегийн ордод оруулаагүй ч нөөц нь тогтоогдсон ашигт малтмалын 50 орчим ордын төрийн эзэмшлийн хувь хэмжээг тогтоох, иргэдийн Хуримтлалын данс, хадгаламжийг нэмэгдүүлэх ажлыг шат дараатай хэрэгжүүлнэ.

Энэ чиглэлээр шинэ Ажлын хэсэг байгуулагдсан. Үүн дээр хууль, санхүүгийн хөндлөнгийн шинжээчдийг ажиллуулж, санхүүгийн модельд тулгуурласан төр, хувийн хэвшлийн аль алинд нь ашигтай байх зарчимд суурилж, газрын хэвлийн баялгийн 51 хувь нь хэрхэн иргэдэд вэ гэдэг бодлогын хүрээнд ажиллана.

Төр хувийн хэвшлийн бизнесийн үйл ажиллагаанд оролцох биш, шууд байгалийн баялаг ашигласны төлбөрөө авч, тэр нь иргэний Хуримтлалын данс руу шилждэг тогтолцоог бүрдүүлэхийн төлөө ажиллаж байна. Тэгэхээр иргэд И-Монголиа-д өөрийн нэрээр нэвтэрч ороход харагдаж буй хадгаламж, мега төслүүд хэрэгжихийн хэрээр нэмэгдэх эрх зүйн орчинг бүрдүүлсэн. 

Мөн Эрдэнэс Тавантолгой ХК-ийн 2024 оны үйл ажиллагааны цэвэр ашгаас хувьцаа эзэмшигчдэд ногдол ашиг хуваарилах талаар ТУЗ-ийн даргын танилцуулгыг сонссон. 2024 оны сүүлчээр ногдол ашгийн урьдчилгааг олгосон. Цаашид ЭТТ ХК-ийн 1072 хувьцааг эзэмшиж буй иргэдэд ногдол ашгийг улирал тутамд шатлалтайгаар хуваарилах нь зүйтэй. Ингэснээр төлбөрийн тэнцэл болон инфляцид нөлөөлөхгүй гэж үзэж байна. ТУЗ хуралдаж, ногдол ашгаа хуваарилах ёстой.

2024 оны 12-р сард өгсөн мэдээллээр хувьцаа эзэмшигч иргэдэд 350 мянган төгрөгийн ногдол ашиг хуваарилах боломжтой гэсэн мэдээлэл өгсөн. Үлдсэн 200 мянгын эхнийхийг цагаан сарын өмнө, үлдсэнийг дараагийн улиралд олгох нь зохимжтой гэж үзэж байна.

Мөн өнөөдрөөс И-Монголиа-д дахь иргэдийн Баялгийн сангийн данс руу нэвтэрч асуулгад хариулах боломжтой. “Та ЭТТ-н 1072 хувьцааны ногдол ашгийг бэлэн мөнгөөр авах уу? Хуримтлалын дансандаа хийх үү? Эсвэл хуримтлалын дансанд хийсэн мөнгөөрөө нийслэлийн төсөл хөтөлбөрүүдэд санхүүжүүлэхэд зарцуулах уу? гэдэг сонголтыг иргэн та хийнэ.

Хэрэв бэлэн мөнгөөр авахгүй, хадгаламжид хийнэ гэвэл цаашлаад хөрөнгийн зах зээлд оруулах, үнэт цаас, бонд авах арилжаанд оруулна. Тэгэхээр иргэн та өнөөдрөөс эхлэн асуулгад хамрагдаарай. Хэрэв санал асуулгад оролцоогүй бол энэ мөнгийг шууд таны данс руу шилжүүлнэ.