Сангийн яамны Сангийн яамны Санхүү, төсвийн судалгааны газрын дарга Г.Золбоо “Бид бүх орлогоо шууд зарцуулдаггүй, тодорхой хэмжээнд хуримтлуулдаг. Аль болох улсын төсвийг тодотгохгүй байхыг хичээдэг. 2023 оны төсвийн гүйцэтгэл 723 тэрбум төгрөгийн ашигтай гарсан.  Бид Тогтворжуулалтын санд  1.3 их наяд төгрөг хуримтлуулаад байна” гэв.

Тэрээр өнөөдөр эдийн засгийн сэтгүүлчдийн клубээс зохион байгуулсан хэлэлцүүлэгт оролцож, төсвийн тодотголын талаар мэдээлэл өгсөн юм.

Тогтворжуулалтын сангаас гадна Ирээдүйн өв санг хуримтлалын зорилгоор ашигладаг. Төсвийн дунд, урт хугацааны тогтвортой байдлыг хангах зорилгоор энэ санг байгуулсан.

Төсвийн тогтворжуулалтын санг татвар ногдуулж, төлүүлэхэд ашиглагдсан гол нэр төрлийн эрдэс баялгийн үнэ тухайн жилийн төсөвт тооцсон тэнцвэржүүлсэн үнээс өндөр байсны улмаас нэмэгдэж орсон төсвийн орлого, нэгдсэн төсвийн тэнцвэржүүлсэн тэнцэл ашигтай үед 50 хувиар тооцсон орлого, Засгийн газрын нөөц сангийн тухайн төсвийн жилийн зарцуулагдаагүй үлдэгдэл зэргээс бүрдүүлдэг.