Төрийн болон олон улсын хүмүүнлэгийн байгууллагын 100 гаруй төлөөлөл өнгөрсөн зудын нөхцөл байдал, түүнээс авсан сургамжийн талаар хэлэлцэнэ.

НҮБ-ын Хүнс, хөдөө аж ахуйн байгууллага, Улсын Онцгой Комиссын ажлын алба хамтран 2023-24 онд тохиосон зудын сөрөг нөлөө, үр дагавар, сургамжийн талаар, ирээдүйн гамшгийн эрсдэл, эмзэг байдлыг бууруулах, эрсдэлийг даван туулах чадавхыг бэхжүүлэхэд чиглэсэн “Зудын сургамж” хэлэлцүүлгийг  зохион байгуулна.

Хэлэлцүүлэгт НҮБ-ын Суурин зохицуулагчийн ажлын алба, Онцгой байдлын ерөнхий газар, Сүхбаатар аймгийн Хүнс, хөдөө аж ахуйн газрын төлөөлөл зочин илтгэгчээр оролцоно.

Тэд өнгөрсөн зудын нөхцөл байдал, онцгой байдлын хариу арга хэмжээ, малчдын амьжиргаа, мал аж ахуйн үйлдвэрлэл дэх зудын сөрөг үр нөлөө, сургамж, гамшгийн эрсдэл, эмзэг байдлыг бууруулах асуудлын хүрээнд илтгэл танилцуулах юм байна.

НҮБ-ын ХХААБ-аас зудад нэрвэгдсэн малчин өрхүүдийн амьжиргааг сэргээн босгох хэрэгцээг тодорхойлох судалгааг хийжээ. Урьдчилсан үр дүнг хэлэлцүүлгийн үеэр танилцуулна.

Мөн гамшгийн эрсдэл, бэлэн байдлын хүрээнд илтгэл танилцуулахаар НҮБ-ын ХХААБ-ын Ази, Номхон далайн бүсийн Албаны зөвлөх, мэргэжилтэн уригдан оролцож байна. Түүнчлэн, Үндэсний давхар даатгал ХК-аас малын индексжүүлсэн даатгалын зарим асуудлаар танилцуулна.

Тус хэлэлцүүлэгт 21 аймгийн Онцгой байдлын газар, Хүнс, хөдөө аж ахуйн газар, Хөдөлмөр, халамж үйлчилгээний газар, Статистикийн хэлтсийн удирдлага, албан хаагчид, олон улсын хүмүүнлэгийн байгууллагын төлөөлөл оролцоно.

Хэлэлцүүлэг маргааш 09:00-16:30 цагт Блю Скай зочид буудлын Жейд танхимд болно.