Европын Холбооны Элчин сайд ирэх оноос Европын холбооноос тусгайлсан зөвлөх Монголд ажиллахаар болсныг мэдэгдлээ.

Тодруулбал Хууль зүй, дотоод хэргийн сайд О.Алтангэрэл Европын Холбооноос Монгол Улсад суугаа Онц бөгөөд Бүрэн эрхт Элчин сайд Ина Марчюлёнитег хүлээн авч уулзав.

Монгол Улсын Гадаад бодлогын үзэл баримтлалд Европын Холбоог “гуравдагч хөрш” хэмээн тодорхойлж, харилцаа хамтын ажиллагаа олон салбарт өргөжин хөгжиж, хууль зүйн салбарт Арилжааны эвлэрүүлэн зуучлалыг бэхжүүлэх болон Иргэний хэргийн шүүхийн шийдвэр гүйцэтгэлийг сайжруулах зэрэг төслүүд амжилттай хэрэгжин үр дүнгээ өгч буйд талархалтай байгаагаа салбарын сайд илэрхийлсэн.
Хатагтай Ина Марчюлёнитегийн зүгээс УИХ-ын намрын ээлжит чуулганд өргөн мэдүүлэх Хэвлэлийн эрх чөлөөний тухай, Жагсаал, цуглааны журмын тухай зэрэг хүний эрх, эрх чөлөөг хангах томоохон хуулийн төслүүд батлагдана гэдэгт итгэлтэй байгаагаа илэрхийллээ. Улмаар 2025 оноос Европын холбооноос тусгайлсан зөвлөх Монгол Улсад ажиллуулах болсон талаар мэдэгдсэн юм.

Талууд цаашид Монгол Улс, Европын холбооны Засгийн газар хоорондын Түншлэл, хамтын ажиллагааны хөтөлбөрийг улам өргөжүүлж, гишүүн орнуудаас экспертүүдийг урьж ажиллуулахын зэрэгцээ хууль зүйн салбарын алба хаагчдын чадавхыг бэхжүүлэх, харилцан туршлага солилцох, техник технологийн дэмжлэг үзүүлэх боломжийн талаар санал солилцжээ.

Эх сурвалж: Хууль зүй, дотоод хэргийн яам