Өчигдөр буюу зургаадугаар сарын 15-ны өдөр Өвөрхангай аймгийн Сант сумын Ардчилсан Намын дарга бусдын гарт амиа алдсан гэх хэрэгтэй холбоотойгоор Цагдаагийн ерөнхий газраас мэдээлэл өглөө. 

Тус аймгийн цагдаагийн байгууллагын бүрэлдэхүүн шуурхай ажиллаж, мөрдөн шалгах ажиллагааг үргэлжлүүлж буй бөгөөд урьдчилсан байдлаар таарамжгүй харилцааны улмаас маргалдаж, иргэн О намын даргын биед халдаж, амь насыг нь хохироосон нь тогтоогдсон. 

Хэрэг үйлдсэн этгээдийн согтолтын зэрэг 1.28 хувьтай гарсан бөгөөд амиа алдсан иргэний хувьд эрүүл байсан гэв. Хэрэв санаатайгаар аминд нь хүрсэн нь тогтоогдвол шүүхийн байгууллагаас зохих ялыг оногдуулна. 

Шалгалтын явцад Иргэн О ухуулагчийн үнэмлэх авсан болох нь тогтоогдоод байгаа. Хэн гэдэг нэр дэвшигчийн ухуулагчаар ажиллаж байсан зэрэг мэдээллийг өгөх боломжгүй гэв. О нь Өвөрхангай аймгийн Сант сумын иргэн аж. Мөрдөн шалгалтын ажиллагаа дууссаны дараа дэлгэрэнгүй мэдээллийг өгнө хэмээн ЦЕГ-аас мэдээллээ. 

Мөн уг хэрэгт нийслэлийн цагдаагийн байгууллагаас мэргэжлийн баг, ажлын хэсэг гарган ажиллаж байгаа бөгөөд хэргийг шуурхай, шударга шалган шийдвэрлэнэ гэсэн юм.