“НҮБ-ын Ази-Номхон Далайн орнуудын Хөдөө аж ахуйн статистикчдын 29 дэх хурал”-ын нээлт өчигдөр болсон. Энэ үеэр бид манай улс хиймэл дагуулын зураг ашиглан газар тариалангийн талбай, ургац хураалтыг нэр төрлөөр нь тооцож алсын зайнаас тандан судлах шинэ аргачлалыг туршсан талаар ҮСХ-ны дарга Б.Батдаваагаас тодруулсан юм.

Тэрээр “Үндэсний статистикийн хороо Дэлхийн банкны “Ухаалаг засаг” төслийн тусламжтайгаар ургац хураалтын мэдээг сансрын зураг болон дрон ашиглан гаргах туршилтыг хийж байгаа.

Сансрын зургийг ашиглаад талбайн аль хэсэгт их усалгаа шаардах вэ зэргийг тодорхойлох микро мэдээллийг тухайн ААН-ид гаргаж өгөх боломжтой болно

Энэ судалгааны гол зорилго уламжлалт арга буюу цаасаар тухайн баг хорооноос мэдээлэл цуглуулдаг байсан бол одоо сансрын зураг ашиглаад ямар хэмжээний талбайд ямар ургамлын төрлийг тариалж байна гэдгийг туршин тооцож байна. Өөрөөр хэлбэл ургамлын гэрлийн хугарлыг ашиглаад ямар төрлийн ургамлын нэр төрлийг тариалж байгааг таниулж буй юм.

Энэ туршилтыг өнгөрсөн зургаадугаар сард эхлүүлсэн. Туршилт судалгааны оновчлол 90 хувьд дөхсөн байсан. Хөдөө аж ахуйн салбар олон төрлийн техник тоног төхөөрөмж, ус ашигладаг. Тэгэхээр бид сансрын зургийг ашиглаад талбайн аль хэсэгт их усалгаа шаардах вэ зэргийг тодорхойлох микро мэдээллийг тухайн ААН-ид гаргаж өгөх боломжтой болно. Ингэснээр ХАА-н салбарын бүтээмж сайжирна гэсэн хүлээлттэй байгаа. Улсын хэмжээн дэх ургацын явцын мэдээллийг харж байгаад энэ жил ямар хэмжээний ургац хурааж авах боломжтой талаарх бодит мэдээллийг бэлэн болгох юм.

Туршилт судалгаа амжилттай болж хэрэглээнд нэвтэрвэл мэдээллийн хурд, оновчил нэмэгдэнэ” хэмээсэн юм.

НҮБ-ын Хүнс, хөдөө ахуйн байгууллага болон Монгол Улсын Үндэсний статистикийн хороо, Гадаад харилцааны яам, ХХААХҮЯ хамтран уг хурлыг зохион байгуулж буй юм.

Тус хурлаар хөдөө аж ахуйн хүрээний бодлого шийдвэрт шаардлагатай тоон мэдээллийг тооцоход олон улсын туршлага, шинэ аргачлалын талаар мэдээлэл солилцох юм.