Хайгуулын тусгай зөвшөөрлийг сонгон шалгаруулалтаар олгох журмыг ХЗДХЯ хууль тогтоомжийн актад бүртгэжээ.

Аж үйлдвэр, эрдэс баялгийн яам удахгүй туршилт хийж, тусгай зөвшөөрөл дахин олгож эхэлнэ гэв. Өнөөдөр Засгийн газар хуралдсан. Энэ хурлаар хайгуулын шинэ журмыг танилцуулжээ.

Хайгуулын тусгай зөвшөөрлийн шинэ журмын заалтууд  

• Нийт зарласан талбайн 50 хувьд сонгон шалгаруулалтаар хайгуулын тусгай зөвшөөрөл олгоно.
• Сонгон шалгаруулалтын үнийн санал 70/30 байсныг 60/40 болгожээ.
• Өмнө нь нэг оролцогчийг л шалгаруулдаг байв. Тэр хүн дуудсан үнээ байршуулаагүй бол тэр сонгон шалгаруулалт хүчингүй болдог байв. Иймд хоёр оролцогч шалгаруулдаг болно.
• Босго үнэ 4500 төгрөг байсныг 7000 болгожээ.

Хайгуулын болон ашиглалтын тусгай зөвшөөрлийг 2014 оноос сонгон шалгаруулалтын журмаар олгож байв. Энэ дагуу хайгуулын тусгай зөвшөөрөл олголтыг зөвхөн Ашигт малтмалын тухай хуулийн дагуу олгож байна.

Ашигт малтмалын тухай хуулийн 17 дугаар зүйлд заасны дагуу сонгон шалгаруулалтын талбайг ялгах нь төрийн захиргааны байгууллагын чиг үүрэг бөгөөд талбайн солбицлыг тодорхойлохдоо тухайн аймаг, нийслэлийн Засаг даргад бичгээр, цахим шуудангаар дамжуулан мэдэгдэнэ.

Мөн хуулийн 17.2-т заасны дагуу Аймаг, нийслэлийн Засаг дарга нь 45 хоногийн дотор төрийн захиргааны байгууллагад хариу өгөх бөгөөд энэ хугацаанд хариу өгөөгүй бол тухайн саналыг зөвшөөрсөн гэж үзнэ. /Зөвхөн аймаг, нийслэлийн засаг даргаас санал авдаг/

17.3-т хайгуулын тусгай зөвшөөрөл олгох талбайн солбицлыг энэ хуулийн 17.2-т заасны дагуу геологи, уул уурхайн асуудал эрхэлсэн төрийн захиргааны төв байгууллагын саналыг үндэслэн Засгийн газар батална гэж тус тус хуульчилжээ.