УИХ-ын чуулганы өчигдрийн /2025.03.27/ нэгдсэн хуралдаанаар Засгийн газраас  өдөр өргөн мэдүүлсэн “Гашуунсухайт-Ганцмод боомтын хил дамнасан төмөр зам, нүүрсний худалдаа, Тавантолгойн нүүрсний уурхайн хүчин чадлыг нэмэгдүүлэх хамтын ажиллагааны тухай Монгол Улсын Засгийн газар болон БНХАУ-ын Засгийн газар хоорондын хэлэлцээрийг соёрхон батлах тухай хуулийн төслийг хуралдаанд оролцсон 110 гишүүний 98 нь дэмжсэнээр хуулийн төслийг эцэслэн баталлаа.

Энэ асуудлыг хэлэлцэн үед УИХ-ын гишүүн Ц.Идэрбат Эрдэнэс Тавантолгой компанийн 1072 хувьцаатай холбоотой асуудлыг хөндөв.

Тэрбээр, Олон жил гацсан төслүүд амжилттай хэрэгжиж эхэллээ. Чуулганы завсарлагаанаар сонгогчидтой уулзаж явахад иргэд 1072 хувьцааны талаар маш их хөндөж байна. Нүүрсний хулгайг илрүүлж, 1072 хувьцааны ногдол ашиг жил бүхэн өсөж байгаа нь иргэдэд маш том мессэж өгсөн байна. Очсон сум болгонд ялангуяа ахмадууд энэ талаар хөндөж, сайн мэдээлэлгүй байснаас 1072 хувьцаагаа төрд худалдсан. Одоо бид  хувьцаандаа эзэн болмоор байна, бидэнд боломж олгооч гэсэн асуудлыг тавьж байна. Үүнд хариулт авъя гэв.



Аж үйлдвэр, эрдэс баялгийн сайд Ц.Туваан, 2016 онд иргэн бүрд ЭТТ ХК-ийн 1072 хувьцааг эзэмшүүлсэн. Тухайн үеийн Засгийн газраас “300 ширхэг хувьцаагаа нэрлэсэн үнээр нь сайн дурын үндсэн дээр борлуулах боломжтой” гэсэн шийдвэр гарсан. Энэ шийдвэрийн дагуу зарим иргэд 1072 хувьцааныхаа 300 ширхэг хувьцааг 300 мянган төгрөгөөр арилжсан. Иргэд сайн дураараа Засгийн газартаа зарах шийдвэрээ гаргасан хэмээн тайлбарлаж байтал УИХ-ын дарга сайдын чанга яригчийг хаав.

УИХ-ын дарга Д.Амарбаясгалан, 1072 хувьцаатай холбоотой асуудлыг Засгийн газраар хэлэлцээд ямар шийдвэр гаргаснаа УИХ-д эргэн танилцуулах нь зүйтэй байх. Хувьцаагаа бүтнээр болон хэсэгчилж зарсан давхардсан тоогоор 300 мянган иргэн бий. Тухайн үеийн оюутнууд 500 мянгыг, төрийн албан хаагчид 300 мянгыг, зарим ахмадууд 1072 хувьцаагаа бүтнээр нь гэх мэтээр зарсан гэж тодотгоод, Засгийн газраар энэ асуудлыг хэлэлцээд хэрхэн шийдвэрлэснээ УИХ-д танилцуулахыг хүсэв.