Манай улсад өнөөдрийн байдлаар нийт 6693 стандарт мөрдөж байгаагаас 45 хувь нь олон улсын стандартын түвшинд хүрчээ. Мөн стандарт, хэмжил зүйн салбарын ажил үйлчилгээний төлбөрийг шинэчлэн, мөрдөж байна.

Өнгөрсөн онд 3.4 тэрбум төгрөгийн хөрөнгө оруулалтаар эталон тоног төхөөрөмжийн хүчин чадлыг нэмж, Монголд анх удаа хийн тоолуур шалгаж баталгаажуулах лабораторитой болжээ.

Мөн Хүнсний аюулгүй байдлын үндэсний лавлагаа лаборатори пестицидийн үлдэгдлийг бүрэн тодорхойлж, хүнсний аюулгүй байдлыг хангах нөхцөлийг сайжруулсан. 11 аймгийн Стандарт, хэмжил зүйн хэлтэс шинээр физик, химийн болон уртын хэмжих хэрэгслийг шалгаж баталгаажуулах лабораторитой болсон байна.

Стандарт, хэмжил зүйн салбарын удирдах ажилтны сургалт, зөвлөгөөнд дээрх мэдээллийг өгөв.

Засгийн газрын 2024-2028 оны үйл ажиллагааны хөтөлбөрт “Нэг улс-Нэгдсэн стандарт” хөтөлбөр хэрэгжүүлэх, бүтээн байгуулалт, мега төслийг дэмжих, технологид суурилсан инновац бий болгохын тулд олон улсын стандартыг нутагшуулах, Хэмжил зүй, сорилт туршилтын лабораторийн техникийн чадавхыг нэмэх зорилтуудыг тусгасан байна.

Энэ хүрээнд стандартчилал, хэмжил зүйн салбарын цаашдын хөгжилд түлхэц үзүүлэх, салбарын тулгамдсан асуудлуудыг шийдэх, хүн амын эрүүл, аюулгүй амьдрах орчныг хангах зорилгоор “Стандартчилал, техникийн зохицуулалт, тохирлын үнэлгээний итгэмжлэлийн тухай хууль”-ийн шинэчилсэн найруулгын төслийг боловсруулна.

УИХ-ын хаврын чуулганаар хэлэлцүүлэхээр бэлтгэл ажлыг хангаж байгааг Шадар сайд С.Амарсайхан онцоллоо.