УИХ-ын гишүүн, Шадар сайд Т.Доржханд өнгөрсөн наймдугаар сараас хойш Эрчим хүчний салбарын хөрөнгө оруулалт, үнэ тарифын шинэчлэл, мега төслүүд хариуцсан дэд хорооны даргаар томилогдон ажиллаж байна.

Энэ хороонд Засгийн газар, УИХ, хувийн хэвшлийн төлөөлөл багтжээ. Тус хорооноос өрхүүдэд нийлүүлж буй эрчим хүчний үнийг 30 болон 50 хувиар нэмэх саналыг наймдугаар сард оруулсан. Тодруулбал цахилгааны үнийг 30, дулааны үнийг 50 хувиар нэмэх санал оруулсан юм.

Үнийг арваннэгдүгээр сард нэмэх Засгийн газрын шийдвэр гарсан. Энэ дагуу Монголбанк эрчим хүчний үнийн нэмэгдэл инфляц 0.8 нэгжээр өсөх тооцоог өнгөрсөн сард хийжээ.

Тэгвэл Эрчим хүчний салбарын хөрөнгө оруулалт, үнэ тарифын шинэчлэл, мега төслүүд хариуцсан дэд хорооны дарга Т.Доржханд Узбекистан улсад туршлага судалжээ.  Тэрээр “Эрчим хүчний салбарыг зоригтой шинэчилнэ. Энэ салбарын төрийн өмчит компаниудын бүтцийг өөрчилнө. Энэ салбарт төрөөс монопол тул чөлөөт зах зээл рүү шилжиж чадаагүй. Үр ашгийг нь сайжруулна. Энэ салбарт үйл ажиллагаа явуулж буй компаниудыг нээлттэй, олон нийтийн болгож, хөрөнгө оруулалт татна. Үүний тулд үнэ тарифыг өөрчилж байна. Эхлээд энэ салбар алдагдалгүй болох ёстой. Эрчим хүчний нийлүүлэлт өсвөл үнэ буурна. Дунд хугацаанд ийм байдлаар төлөвлөсөн” гэж мэдэгдэж байв.