Боловсролын зээлийн сангаас их хэмжээний зээл авч, өндөр хөгжилтэй орнуудад сурсан ч зээлээ эргэн төлөөгүй тохиолдлууд олон нийтийг бухимдуулсан. Уул уурхайн дэд сайд асан О.Батнайрамдал өчигдөр энэ асуудлаар хэвлэлийн хурал хийсэн юм.

УИХ-ын гишүүн Т.Доржханд өнөөдөр цахим хаягтаа дараах мэдээллийг оруулжээ.

-Хүү маань 2019 онд дэлхийд хоёрдугаарт эрэмбэлэгдсэн, Кембриджийн их сургуульд элсч, журмын дагуу түүгээрээ зээл авсан нь үнэн. 2020 онд аав нь УИХ-ын гишүүн болсон тул өөрийн санаачилгаар зээлээ зогсоосон. Мөн мөнгөө цуглуулж, төлбөрөө өөрөө барагдуулна, та битгий оролцоорой гэсэн шийдвэрийг нь аавын хувьд дэмжиж байгаа. Ажилд орсон цагаасаа хойш мөнгөө цуглуулж, мөн холбогдох газарт нь хандаж төлөхөө мэдэгдсэн байна. БЗС зээлийг буцаан төлүүлэх нь зөв.

Өнөөдрийн ханшаар тооцвол гадаадад суралцсан 2368 оюутан 363 тэрбум төгрөгийг Боловсролын зээлийн сангаас авч, татвар төлөгчдийн мөнгөөр сурчээ.

• Бакалаврт 167 тэрбумыг 421 суралцагч,
• Магистр, докторт 1947 суралцагч 196 тэрбум төгрөгийн зээл авснаас 99-100 хувь эргэн төлөөгүй.

Дээрх зээлдэгчийн 90 хувь нь өндөр албан тушаалтан, мэдээлэлд ойр хүмүүсийн хамаарал бүхий этгээдүүд байна. Мөн магистр зэргийн 196 тэрбум төгрөгийн зээлийн 40 хувийг буюу 867 оюутны зээлийг чөлөөлжээ.

2019 онд М.Ариунжаргал Боловсролын зээлийн сангийн захирлаар, УИХ-ын гишүүн Ё.Баатарбилэг Боловсролын сайдаар ажиллаж байв.