Лондон хотноо төвтэй Олон улсын далайн байгууллагын Ассамблейн 34 дүгээр чуулган өчигдөр эхэлж, Төлөөлөгчдийн тэргүүнүүдийн уулзалтад Элчин сайд Б.Энхсүх оролцов. Хоёр жилд нэг удаа болдог энэ Ассамблейд Зам, тээврийн яамны харьяа Далайн захиргааны дарга М.Өлзий болон холбогдох албан тушаалтнууд оролцож байна. 

Одоогийн байдлаар 25 улсын 200 гаруй хөлөг онгоц Монгол Улсын далбаатай их далайд аялж байна.

Олон улсын далайн байгууллага нь далайн тээврийн аюулгүй байдлыг хангах, хөлөг онгоцнуудын далай тэнгис болон агаар мандалд учруулах бохирдлоос урьдчилан сэргийлэх үйл ажиллагаа явуулдаг НҮБ-ын төрөлжсөн байгууллага юм. 

Монгол Улс Олон улсын далайн байгууллагад 1996 онд гишүүнээр элсэж, далайн салбарын 20 гаруй гэрээ, конвенц, тэр дундаа Далайд гарцгүй улсын далбаагаа мандуулах эрхийг хүлээн зөвшөөрөх тухай тунхаглалд нэгдэн орсноор далайн тээврийн үйл ажиллагааг эрхлэх, хөлөг онгоцны бүртгэлийн үйл ажиллагаа явуулах боломжтой болсон гэж Зам тээврийн хөгжлийн яамнаас мэдээлэв.