Боловсролын судалгааны үндэсний хүрээлэн Японы олон улсын хамтын ажиллагааны байгууллага (ЖАЙКА) -тай хамтран “Бага ангийн байгалийн ухааны сургалтыг дэмжих цахим хэрэглэгдэхүүн боловсруулах, турших төсөлт судалгаа”-г 2024 оны тавдугаар сараас эхлэн хэрэгжүүлж, энэ сарын 15-нд төсөлт судалгааны тайланг хэлэлцүүллээ.

Төслийн хүрээнд IV, V ангийн “Хүн ба байгаль” хичээлийн тус бүр 20 видео хичээл, дасгал ажлын хуудас, багшийн хичээлийн төлөвлөгөө гэсэн гурван төрлийн материалыг холбосон цогц цахим хичээл боловсруулсан байна.

ЧИКО ЯМАОКА: ХАРЬЦУУЛСАН СУДАЛГААНААС ХАРАХАД САЙН ҮР ДҮН ГАРСАН ТУЛ УЛС ОРОН ДАЯАР ХИЧЭЭЛ ҮЗЭХ БОЛОМЖТОЙ БОЛГОНО

Төслийн үйл явц болоод бэлтгэл ажлын тухай Байгалийн ухааны цахим хэрэглэгдэхүүнийг боловсруулах төсөлт судалгааны судалгааны багийн ахлагч Чико Ямаокагаас тодрууллаа.

-Төслийн бэлтгэл ажил болон үйл явц хэдий хэр хугацаанд ямар байдлаар өрнөснийг хуваалцаач?
-Боловсролын яам, Жайка, болон БСҮХ 2024 оноос энэхүү төслийн санааг гарган ярилцаж байсан ба удалгүй төслөө эхлүүлэхээр санамж бичиг солилцсон.

Жайка-аас Японд энэ төслийг хэрэгжүүлэх компанийн сонгон шалгаруулалт зарласан юм. Үүнд манай компани тэнцэж энэ төслийг эхлүүлсэн.

Төслөө эхлэхийн өмнө хичээл маань ямар хэлбэртэй, ямар бүтэцтэй байх уу гээд маш дэлгэрэнгүй төлөвлөг гаргаж, хамтрагчидтайгаа эхний ээлжид нэг жишээ загвар болгон хичээл боловсруулахаар тохиролцсон юм.

Хамрагдсан туршилтын сургуулиуддаа түрүүчийн бэлэн болсон хэрэглэгдэхүүнээ өнгөрсөн оны есдүгээр сараас тарааж эхлэв. Бидний арга барил бол цөөн цөөнөөр хийгээд шууд тараагаад явах байсан.

Энэ оны тавдугаар сар хүртэлх хичээлийн агуулгыг багтаасан хэрэглэгдэхүүн боловсруулав. Хэрэглэгдэхүүн тарааж эхлэхээс өмнө есдүгээр сард гарааны судалгааг хийж, хэрэглэгдэхүүнээ тарааж дуусаад тавдугаар сард мөн эцсийн судалгааг хийсэн юм. Ингээд хоёр судалгаагаа харьцуулан үр дүгнэхэд сайн үр дүн гарсан учир энэ хичээлийн жилээс “medle” платформд тавигдаж улс орон даяар энэхүү хичээлийг үзэх боломжтой болно.

-Магадгүй цаашид ч гэсэн IV, V ангиас бусад ангиудад ийм төрлийн цахим хэрэглэгдэхүүн боловсруулах шаардлага гарвал юун дээр анхаарахыг зөвлөх вэ?

-Цахим хичээл боловсруулахаас өмнө хүүхдүүдийг яаж уйдаахгүйгээр хөгжилтэй аргаар сонирхолтой заах уу гэдгийг маш сайн бодолцох хэрэгтэй. Үүнийг л сануулахыг хүсэж байна.

М.УУГАНЗАЯА: СУУРЬ СУДАЛГААНЫ ҮЕД ТУРШИЛТЫН БҮЛГИЙН БАЙГАЛИЙН УХААНЫ МЭДЛЭГ ДУНДЖААС ДООГУУР БАЙСАН

Төслийн үр дүнгийн талаар Боловсролын судалгааны үндэсний хүрээлэнгийн байгалийн ухаан хариуцсан эрдэм шинжилгээний ажилтан М.Ууганзаяагаас тодрууллаа.

-Төсөл эхлэх болон дуусахад хийсэн судалгаагаар ямар үр дүн гарсан бэ? Бага ангийн багш болон сурагчдад ямар өөрчлөлт гарав?
-Бага ангийн багш нар маш олон хичээлийг заадаг. Тэр дундаа байгалийн ухааны хичээлийг заах онолын мэдлэг, арга зүй тал дээр ойлголтын зөрүү байсан бол цахим хэрэглэгдэхүүн ашиглаж эхэлснээр онолын мэдлэгээ бататгасан нь ажиглагдсан. Багш нарын хичээл бэлдэх хугацаа мөн багассанаар багш эргээд сурагчидтайгаа ажиллах, дэмжих, харилцан ярилцах боломж мөн нэмэгдсэн.

Сурагчдын хувьд цахим хичээлээ анхааралтай үзэж ажиглалт, туршилтын талаарх өөрийн бодлыг чөлөөтэй илэрхийлж байсан.

Суурь судалгааны үед туршилтын бүлгийн байгалийн ухааны мэдлэг дунджаас нэлээн доогуур байсан бол эцсийн судалгаагаар хоцрогдол арилсан байсан нь онолын мэдлэг сайжирч сурах бичгийн агуулгыг бүрэн эзэмшсэн нь харагдаж байна.

Цахим хэрэглэгдэхүүнийг ашиглан хичээл орж буйг ажигласан багш нарын сэтгэгдлээс үзэхэд сурагчдын сонирхол, сониуч байдал нэмэгдэж, хичээлийн оролцоо сайжирсан гэх мэт эерэг дүгнэлт өгчээ" хэмээн ярилаа. 

Г.Халиунаа