Өнөөдөр (2025.08.22)-нд Эрүүл мэндийн сайд Ж.Чинбүрэн болон бусад албаны хүмүүс Азийн хөгжлийн банкны Хүн, нийгмийн хөгжлийн захирал Софиа Шакилыг хүлээн авч уулзлаа.

Уулзалтын үеэр “Монгол улсын орон нутгийн эрүүл мэндийн байгууллагуудыг чадавхжуулах” төслийн урьдчилсан танилцуулгыг хийж санал солилцов.

Төслийн үндсэн зорилго нь аймаг, орон нутгийн эрүүл мэндийн байгууллагуудыг шинэчилж чадавхжуулах, яаралтай түргэн тусламжийн сүлжээ тогтолцоог бий болгох, орон нутгийн эрүүл мэндийн байгууллагуудад зөв менежмент систем нутагшуулах бөгөөд төслийг 2026-2031 оны хооронд хэрэгжүүлэхээр төлөвлөжээ.

Эрүүл мэндийн сайд Ж.Чинбүрэн "Орон нутгийн эрүүл мэндийн байгууллагуудыг чадавхжуулах төсөл нь манай улсын эрүүл мэндийн салбарт цаг үеэ олсон, нэн шаардлагатай өөрчлөлт, ахиц, чанарыг авчрах ба орон нутгийн иргэдийн эрүүл мэнд, амьдралын чанарт шууд сайн нөлөө үзүүлэх боломжтой.

Мөн Монгол улсад жилд тохиолдож буй нас баралтын 1/3-ийг аварч болох тохиолдол эзэлж байна. Иймд яаралтай, эрчимт эмчилгээг орон нутагт “яаралтай, чанартай” үзүүлдэг болох боломж бүрдэх нь хамгийн чухал байна. 

Алслагдсан орон нутгийн иргэд яаралтай тусламж авч, эрчимт эмчилгээ хийлгэхээр хэдэн зуун км машинаар давхидаг байдлыг өөрчилснөөр олон хүний амь нас, эрүүл мэндийг аварч, хамгаалж чадах учраас төслийг бүх талаар дэмжин, хамтарч ажиллана" гэв.

Төслийн төсөв нь 215 сая доллар орчим байх урьдчилсан тооцооллыг өнөөдөр танилцуулсан бөгөөд сонгогдсон аймаг бүрийн эрүүл мэндийн байгууллагууд  6-7 сая долларын шинэчлэл, хөрөнгө оруулалт хийх төлөв байгаа аж. Ингэхдээ:

1. 18 аймгийн нэгдсэн эмнэлгүүд болон Бүсийн оношилгоо, эмчилгээний төвүүдийг шаардлагатай дэд бүтэц, тоног төхөөрөмжөөр нь хангах ба уур амьсгалын өөрчлөлтийг даван туулах, сөрөн тэсвэрлэх чадвартай шийдлүүдийг ашиглах
2. Орон нутгийн эмнэлгүүдийн засаглалыг сайжруулж, хүний нөөцийг чадавхжуулах
3. Яаралтай тусламж үйлчилгээний төлөвлөлт дэд бүтцийг сайжруулж,  хөдөлгөөнт буюу явуулын эмнэлгийн үйлчилгээг тоног төхөөрөмжөөр хангах 
4. Хавдрын эрт илрүүлэг, яаралтай эрчимт эмчилгээний төвүүдийг бий болгож, хими, туяа эмчилгээг хийх нөхцөлийг бүрдүүлэхээр төлөвлөсөн байна. 

Жилд орон нутагт амьдардаг 280 мянган иргэн аймгийнхаа эмнэлэгт эрүүл мэндийн тусламж үйлчилгээ авахгүйгээр Улаанбаатар хот дахь лавлагаа шатлалын эмнэлгүүдийг шууд зорин ирдэг аж.

Төслийн үр дүнд энэ урсгал багасах ба орон нутгийн иргэд амьдарч буй орон нутагтаа санхүүгийн дарамтгүй, явдал чирэгдэлгүйгээр эрүүл мэндийн тусламж үйлчилгээ авах нөхцөл бүрдэхийг өнөөдрийн уулзалтаар хоёр тал ярилцан, санал нэгдлээ.

Эх сурвалж: Эрүүл мэндийн Яам