Дэлхийн II дайн дууссаны 80 жилийн ойд зориулсан цэргийн парадыг Бээжингийн Тяньанмэний талбайд зохион байгуулж байна.  

Оросын Ерөнхийлөгч Владимир Путин, Хойд Солонгосын удирдагч Ким Жон Ун нар Ши Жиньпиний хоёр талд дагалдан Тяньанмэний талбайгаар хамт алхжээ. Энэхүү зураглал нь түүхэн үйл явдал боллоо хэмээн шинжээчид үзэж буй. Учир нь Ши, Путин, Ким гурван удирдагч анх удаа хамт уулзаж буй нь энэ аж. 

Өмнө нь тэд тус тусдаа хоёулаа уулзаж байсан юм. Тухайлбал,

Владимир Путин – Ким Жон Ун

• 2019 он, Владивосток – Ким Жон Ун анх удаа ОХУ-д айлчилж, Путинтэй уулзсан. Энэ нь ЗХУ нуран унаснаас хойш Орос–Хойд Солонгосын удирдагчдын хамгийн өндөр түвшний уулзалт болсон.
• 2023 он, Оросын Алс Дорнод (Восточный сансрын төв) – Ким Жон Ун дахин ОХУ-д айлчилж, Путиний хамт зэвсгийн болон сансрын технологийн хамтын ажиллагаа хэлэлцсэн.

Ши Жиньпин – Ким Жон Ун

• 2018 он – АНУ–Хойд Солонгосын уулзалтын өмнө, Ким Жон Ун БНХАУ-д дөрвөн удаа айлчилж, Ши Жиньпинтэй уулзсан. Энэ нь олон улсын тавцанд гарч буй байр сууриа бэхжүүлэх зорилготой байлаа.

Ши Жиньпин – Владимир Путин

• 2013 оноос хойш олон удаа уулзсан. Хоёр орны харилцаа "Стратегийн түншлэл"–ийн түвшинд хүрч, худалдаа, эрчим хүч, батлан хамгаалалтын салбарт хамтран ажиллаж ирсэн.
• 2022 он, Бээжин – Өвлийн Олимпын өмнө уулзаж, “Хязгааргүй түншлэл”-ийн тухай мэдэгдэл гаргасан.
• 2024 он, Бээжин – Путин БНХАУ-д төрийн айлчлал хийж, харилцаагаа “Шинэ эрин”-ий түншлэл болгон өргөжүүлсэн.

Өнөөдрийн арга хэмжээнд 10 мянга гаруй цэрэг, хэдэн зуун орчин үеийн зэвсэг техникийг танилцуулжээ. Энэхүү парад нь дэлхийн хамгийн том зэвсэгт хүчнийг орчин үеийн болгож буй Ши Жиньпиний бодлогын хүрээнд Хятадын цэргийн хүч хэрхэн өсөн нэмэгдсэнийг харууллаа. Хятадын удирдагч Ши Жиньпин зэвсэгт хүчнээ магтан хэлсэн үгэндээ тэрээр Хятадын өсөлт “Зогсолтгүй урагшлах Хятад” гэжээ.

Мөн Хятадын тив алгасах чадалтай, цөмийн шинэ загварын баллистик пуужинг тэд харсан бөгөөд энэ нь 12 хүртэл цохилтын хошуу тээвэрлэх чадвартай аж. Шинжээчид энэхүү парадад шинэ төрлийн пуужин, хүний удирдлагагүй усан доорх дрон, сөнөөгч онгоцнуудыг танилцуулна гэж таамаглаж байна.

Эх сурвалж: BBC