Ц.Санжаачойпэл, Э.Тэмүүлэн, Л.Алтан-Очир нарт зодуулсан хохирогч залуугийн аав Д.Дашзэвэг өнөөдөр Дүүргийн Эрүү, Иргэний хэргийн хялбар ажиллагааны анхан шатны тойргийн шүүхэд өнөөдөр болсон хурлын дараа сэтгүүлчдийн асуултад хариулт өглөө.  

-Таны хүүг хөнгөн гэмтсэн, эрүүл мэнд нь сайжраад ирсэн гэж яллагдагч талынхны ар гэрийнхэн цахим хуудаснаа бичсэн байна. Хүүгийн тань бие ямар байна вэ?
-Хүү минь эрүүл саруул болох ямарч боломжгүй гэмтэл авсан. Сая Солонгост зөвхөн нүүрний цөмөрсөн ясыг наашлуулж, хугарсан яснуудыг эвлүүлж хадах мэс засалд орсон. Эдгэрэх явцдаа байгаа учир дараагийн мэс засалд 6-8 сарын дараа орно.

-Одоо ямар эмчилгээ хийлгэж байна вэ?
-Тархин дахь цус хуралтыг шимэгдүүлэх эмчилгээ хийж байна. нүдний харааны асуудлаар байнгын хяналтад байна. Мэс заслын дараа хэд хоногийн завсар гарахад нь гэртээ ирж тэнхрээд, ирэх бүтэн сайнд /2025.09.14/ Солонгос руу эмчилгээндээ явах төлөвлөгөөтэй байсан.

Гэтэл манай хүүг бусдын биед хөнгөн гэмтэл учруулсан гэж яллагдагчаар татаж, хилийн хориг тавих шийдвэр прокуророос гаргасан. Прокурорын хүсэлтийн дагуу хилийн хориг тавих, эсэх шүүх хурал сая боллоо. 

-Хүү тань сэтгэл зүйн хувьд ямар байдалтай байна вэ?
-Маш хүнд байгаа. Бусад залуусын адил сургууль төгсөөд ирсэн. Мэргэжлээрээ ажиллахын өмнө ийм байдал боллоо. Эрүүл мэндийн байдалд цаашид ямар хүндрэл учрахыг хэлж мэдэхгүй.

-Яллагчдын ар гэрийнхэн тантай уулзаж, уучлалт гуйсан уу?
-Ар гэрийнхэн нь уулзаж, уучлалт хүссэн. Хүүгийн эмчилгээний зардлыг эмнэлэг рүү нь шилжүүлж байгаа гэв.