МАН-ын бүлэг хуралдаж, томуугийн өнөөгийн нөхцөл байдлын талаар Эрүүл мэндийн сайд Ж.Чинбүрэн мэдээлэл өглөө. Энэ жил томуугийн өвчлөл өнгөрсөн гурван жилийн дундажтай харьцуулахад 15-19 хувиар өссөн байна.

Өвчлөлийг бууруулахын тулд өнгөрсөн долоо хоногт бага ангийн, энэ долоо хоногоос дунд ангийн сурагчдын хичээлийг түр цахим хэлбэрт шилжүүлжээ. Ингэснээр амбулаторид үзүүлэхээр ирж буй хүүхдүүдийн тоо буурсан ч эрчимт эмчилгээ болон хэвтэн эмчлүүлж буй хүүхдүүдийн тоо буураагүй байна. Өдөрт 1000 гаруй хүүхэд эмнэлэгт үзүүлэхэд 150-200 нь хэвтэн эмчлүүлж, бусад нь эмийн үйлчилгээ авч байгаа аж.

Энэ онд зургаан сартайгаас зургаан настай хүүхдүүдийг хамруулан 300 мянган тун томуугийн вакцин хийж, 99 хувийн гүйцэтгэлтэй дуусгасан байна. Харин ирэх жил томуугийн эсрэг вакцины хэмжээг 500 мянган тун болгон нэмэгдүүлэхээр төлөвлөжээ.

Мөн маск тогтмол хэрэглэх нь томуугийн халдвараас 75 хувь хүртэл хамгаалах тул олон нийтийн газар маск зүүхийг зөвлөв.