• “Вагнер”-ийн захирал Евгений Пригожины Беларусьт байгааг харуулсан бичлэгийг Телеграмд байршуулжээ.
• Энэ нь Пригожиний зургаадугаар сард, төрийн эргэлт хийхээр санаархсанаас хойших анхны бичлэг.
• ВВС агентлагийн баримт шалгагчид дүрс бичлэгийг шалгаад Беларусьт авсан гэж үзжээ.

Бичлэгт Пригожин дайчдыг хүлээн авч, Украинд сүүлийн  үед болсон үйл явдлуудыг ичгэвтэр гэж хэлэн, хүчтэй шүүмжилснийг харуулсан байна. Тэрээр Вагнер групп ирээдүйд дайнд оролцох талаар хөндөж, “Манай дайчид Украинд сайн тулалдсан. Оросын төлөө их зүйл хийсэн. Гэхдээ бид дахин үүрэг гүйцэтгэхийг хүсэхгүй. Эр зоригоо батлан харуулахын тулд бид хүлээх ёстой. Бид Беларусийн армийг дэлхийн хоёр дахь том арми болгоно. Вагнерийн дайчид мэдлэг туршлагаа ашиглах болно. Бид Украин руу дахин явахын тулд бэлдэнэ” гэж ярьжээ.

Беларусь тус групптэй хамтарч цэргүүддээ сургалт явуулахаар төлөвлөсөн байна.

Бүрэнхийд авсан бичлэгт тэрээр тариан талбай, агуулахууд, модны хажууд, зам дээр зогсож байгаа нь харагджээ. Түүний цаана хүмүүс баярлан хашхиралдах нь ч сонсогдсон байна.

Москва Вагнерийн цэргүүдэд оросын армид нэгдэх эсвэл Беларусь явах сонголт өгсөн юм. Ерөнхийлөгч Путин өнгөрсөн долоо хоногт Коммерсант сонинд өгсөн ярилцлагадаа “Вагнер групп үгүй болсон. Цэргийн, хувийн байгууллагын үйл ажиллагааг зохицуулсан хууль манай улсад байхгүй. Тэгэхээр тэднийг байхгүйд тооцож болно” гэжээ.

Өнгөрсөн сард Евгений Пригожин цэргүүдтэйгээ Москвад 200 км тулж очсон ч буцсан. Харин түүний цэргүүд нийслэл рүү төрийн эргэлт хийх зорилгоор чиглэж байсныг огт мэдээгүй байсан юм.  

Беларусьт ирэх онд сонгууль болно. Иймд олон нийтийг хамарсан жагсаал болохоос сэргийлж, тус улсын Ерөнхийлөгч Лукашенко Вагнерийн цэргүүдийг эх орондоо орогнуулсан байж болзошгүй.

Эх сурвалж: BBC