Боловсролыг дэмжих жил хэмээн зарлаад буй 2026 онд тус салбарын төсөвт 5,3 их наяд төгрөг төсөвлөөд буй. Тэгвэл тус төсвийн зарцуулалтын төлөвлөгөө, багш нарын цалингийн нэмэгдэл, суралцагчдын тоон мэдээллийг инфографикаар хүргэе. 

2025-2026 оны хичээлийн жилд төрийн өмчит сургууль, цэцэрлэгийн хүүхдийн тоо 750 мянга гаруй байгаа бол хүн амын өсөлтийн тооцооллоор энэ тоо хамгийн их болох нь 2030-2031 оны хичээлийн жилд нийт 812 мянга гаруй хүүхэдтэй болохоор байна. 

Өмнө нь дурдсанчлан 2026 онд тус салбарын төсөвт 5,3 их наяд төгрөг төсөвлөөд буй. Энэ нь улсын төсвийн зарлагын 16,4 хувийг эзэлж байна.

Боловсролын нийт төсвийн

• ₮4,3 их наяд нь урсгал зардал
• ₮1,1 их наяд нь хөрөнгө оруулалт
• ₮117,1 тэрбум нь эргэж төлөгдөх зээлд тус тус зарцуулагдана. 

 Монгол улсад боловсролын байгууллага 2429 байгаа ба түүний 1839 нь төрийн өмчит, 590 нь хувийнх байна. Мөн тэдгээр байгууллагуудад 93 мянга 353 багш, ажилтны орон тоо байгаа бол 1 сая 145 мянга 439 хүүхэд суралцаж байна. 

Салбарын цалингийн сан дахь 3,3 их наяд төгрөгийг багш, ажилтуудын цалинд зарцуулна. Тодруулбал 2026 оны

• 1 дүгээр сарын 1-нээс үндсэн цалингийн хэмжээг 50 хувиар,
• 11 дүгээр сарын 1-нээс  үндсэн цалингийн хэмжээг 26 хувиар тус тус нэмэгдүүлэхээр болсон билээ. 

Харин 2026 оны батлагдсан 4,3 их наяд төгрөгийн урсгал төсөв нь  салбарын нийт төсвийн 81,7 хувийг эзэлж байна. Энэ нь 2025 оны тодотгосон төсвөөс даруй 578,2 тэрбум төгрөгөөр нэмэгдсэн байна.  Урсгал төсвийн зарцуулалтыг задалбал;

• ₮2,6 их наяд → ЕБС
• ₮1,3 их наяд → СӨБ
• ₮220,6 тэрбум → Мэргэжлийн болон техникийн боловсрол
• ₮160 тэрбум → Дээд боловсрол
• ₮55,5 тэрбум → Боловсрол, ШУ-ны удирдлага
• ₮33,1 тэрбум → бусад зүйлсэд тус тус зарцуулагдана.  

Дата мэдээний эх сурвалж: Боловсролын яам