Цахим спортын “Counter Strike 2” тоглоомын “StarLadder Budapest Major-2025” буюу энэ оны хоёр дахь дэлхийн аварга шалгаруулах тэмцээн Унгарын Будапешт хотноо үргэлжилж байна.

Өнөөдөр тус тэмцээний гуравдугаар шатны тоглолт эхлэх бөгөөд “The MongolZ” баг 20:00 цагаас Бразилийн "Imperial" багийн эсрэг тоглоно.

Мөн тэд өөрсдийн цахим хуудаснаа: "2990" гэдэг нэр бол бидний анхны алхам. Бидний хамгийн их дурсан санадаг үе. Зургаа, долоон жилийн өмнө гурвалжны гүүрний тэнд давчуухан 2 өрөө байшинд мөрөөдөл, хүсэл зорилгынхоо төлөө харанхуйгаар зүтгэж байсан "амжилтын төлөөх өлсгөлөн" үе. Өдөртөө элэгний нухаштай талх идчихэд л данга байсан үе. 

Тэрхүү нэг жилийн хугацаанд бид тэмцээний шагналын сангаас өөр цалин, орлогогүй ч энэ л тоглоомыг тоглох орчинтой байсан нь хангалттай байлаа. Шалан дээрээ 6, 7-уулаа зэрэгцээд л унтчихдаг байсан.

Монголын Counter Strike-чид цэвэр хичээл зүтгэл, сэтгэл зүрхээрээ туулсан тэрхүү жилүүдэд бид хэн байснаа дурсан "2990"-ээр ирэх улирлын өнгө төрхөө нэрлэлээ. Бидний дотор одоо ч 2990-ийн үеийн "амжилтаар өлссөн" мэдрэмж хэвээр хэмээн хуваалцжээ.