Өнөөдөр зарим хэвлэл мэдээллийн хэрэгслээр Үндэсний аюулгүй байдлын зөвлөлийн ажилтнууд Цагаан сараар хойд хөршийг зорьсон. Буцахдаа авто машиндаа 20 сая ам.доллар бэлнээр авчирсан байж болзошгүй, мөн УОК-ийн бичгийг хуурамчаар үйлдсэн байж болзошгүй гэсэн мэдээллийг түгээсэн юм. Үндэсний  аюулгүй байдлын зөвлөлийн ажлын албаны дарга, хуульч А.Гансүх үүнд дараах тайлбарыг Төрийн ордонд өгөв:

-Ерөнхийлөгч, Ерөнхий сайд, хуучин Ерөнхий  сайд нарын хооронд асуудал үүссэн. Энэхүү мэдээллийг би ҮАБЗ-ийн тэргүүний үүрэг даалгаврын дагуу хийж байна. ҮАБЗ-ийн ажилтнууд ОХУ-аас 20 сая ам.доллар ачиж ирсэн гэдэг мэдээлэл зарим өдөр тутмын сонин болон олон нийтийн сүлжээгээр тарж байна.

Би нэг зүйлийг хариуцлагатайгаар хэлье. ҮАБЗ-ийн ажилтнууд мөнгө авчирсан гэдэг мэдээлэл гүтгэлэг, хуурамч мэдээлэл. Энэ нь улс төрийн зорилготой арга хэмжээ байх. ҮАБЗ бол төрийн тусгай чиг үүргийн байгууллага. Манай албан  хаагчид төрийн албаны тангараг өргөхөөс гадна цэргийн тангараг өргөсөн, тусгай алба хаагчид. Тэд хуулийн дагуу үндэсний аюулгүй байдал, үндэсний язгуур эрх ашгийг хамгаалах үүргээ чин шударгаар, нэр төртэй биелүүлж байна.       

ҮАБЗ-ийн ажлын алба улс төржилгүй үлдсэн ганцхан байгууллага. ҮАБЗ-ийг бүү улстөржүүл.

Манай ажилтнууд ОХУ руу томилолтоор, төрийн тусгай чиг үүрэг биелүүлэхээр ажилласан нь үнэн. Нэр дурдагдсан хүмүүс манайд ажилладаг. Харин ямар хүмүүс явсан талаар хэлэх боломжгүй. ҮАБЗ төрийн тусгай чиг үүргийн байгууллага. Үйл ажиллагаагаа ил биш, далд явуулдаг. 

Онгоц нисэхгүй байгаа учир манай ажилтнууд машинаар хил давж, Улаан-Үд хот хүртэл  машинаар яваад, буцаж ирсэн. УОК-оос бүх зөвшөөрлийг хуулийн дагуу, бичгээр авсан. Автомашиныг хил, гаалийнхан шалгасан. Ямар ч хууль бус зүйл байгаагүй. Байх ч боломжгүй. ҮАБЗ хууль бус үйлдэл хийхгүй, хийдэг ч үгүй.  

Та бүхэн нэг зүйлийг ойлгох хэрэгтэй. Засгийн газрын харьяаны ТЕГ, ЦЕГ, Татварын Ерөнхий Газрыг давж, их хэмжээний мөнгө оруулна гэж байхгүй. Хэрэв боломжтой бол эдгээр байгууллагуудын эрх мэдэлтнүүд л чадна. Эсвэл эрх баригчид л хийнэ. ҮАБЗ-ийн ажлын алба улс төржилгүй үлдсэн ганцхан байгууллага. ҮАБЗ-ийг бүү улстөржүүл. Улс төрийн зорилгоор бүү ашигла гэж хэлмээр байна.     

-Таныг шүүгч нарт нөлөөлдөг хүн гэж Ерөнхий сайд Л.Оюун-Эрдэнэ өчигдөр (2021.03.08) мэдэгдсэн? 
-Шүүгч хүний эрхийг зөрчсөн нь тогтоогдвол ҮАБЗ-ийн зөвлөмж гарган, эрхийг нь түдгэлзүүлэх заалтыг Шүүгчийн эрх зүйн байдлын тухай хуульд оруулсан байв. Одоо энэ заалт хүчингүй болсон. Тэгэхээр бид шүүгчид ямар ч аргаар нөлөөлөх боломжгүй. Ямар ч шүүгчийн томилгоонд оролцдоггүй. Шүүгчид ҮАБЗ шүүгч нарт нөлөөлөх ямар ч боломжгүй. Шүүгч нарыг томилоход ҮАБЗ-өөс ямар ч тодорхойлолт шаардлагагүй. 

Бид албаны болон төрийн нууцыг хамгаалдаг тул ОХУ руу ямар зорилгоор айлчилсныг хэлэх боломжгүй байна. Хэвлэлээр нэр нь гарсан хүмүүс (Ж.Бямбацогт, Г.Галбадрах, Б.Галданжамц) манай ажилтнууд мөн.         

Т.Чимгээ нарыг эрүүдэн шүүж байх үед би энгийн иргэн байсан. Энгийн иргэн хүн ТЕГ-ын мөрдөж буй, маш нууцын зэрэглэлтэй хэрэгт нөлөөлөх боломжгүй.

-Ерөнхий сайд яагаад таны нэрийг онцолсон юм бол?
-Энэ талаар надад мэдээлэл байхгүй. Ерөнхий сайд энэ асуудлыг УИХ-д оруулна гэсэн. Би тэр үед тайлбараа өгнө. 

-Таныг өмгөөлөгч Б.Баасанцогттой холбоотой гэсэн?
-Б.Баасанцогтыг би танина. Намайг ЗТХ-ийн дэд сайд байхад МИАТ-т ажилладаг байсан. Түүнээс ҮАБЗ-д ажилладаггүй.