Өнөөдөр 19:10 цагт Хөвсгөл аймгийн Ханх сумын төв Туртад дахин 4.9 магнитудын хүчтэй газар хөдлөлт болсон талаар АНУ-ын Геологийн албаны сайтад мэдээлжээ.

Ханх сумд өнөөдөр  өглөө  07:47 цагт 4.2 магнитудын хүчтэй газар хөдөлсөн талаар бид өмнө нь мэдээлсэн. Энэ нь өчигдөр 05:32 цагт 6.5 магнитудын хүчтэй болсон газар хөдлөлтийн үргэлжлэл хэмээн ООГХ-ээс тайлбарласан юм.

Мөн өчигдөр үүрээр 05:30 цагт эхэлсэн газар хөдлөлт оройн 18:00 цагийн байдлаар 300 гаруй бүртгэгдээд байна.

Ханх сумын төв Турт нь Хөвсгөл нуурын хөвөөнд, аймгийн төв Мөрөнгөөс хойш 280 км, нийслэл Улаанбаатараас 1020 км, Оростой хиллэх Ханх-Мондийн хилийн боомтоос 22 км зайд оршино. 

ШИНЭЧИЛСЭН МЭДЭЭ 20:17 ЦАГТ: 

Ханх сумд нөхцөл байдал ямар байгаа талаар сумын Засаг дарга Л.Даваабаяртай холбогдож тодруулга авахад:

"Энд 4-өөс дээш магнитудын хүчтэй газар хөдлөлт өнөөдөр 10-аад удаа боллоо. Ер нь нийт 600-700 удаагийн чичирхийлэл мэдрэгдээд байна. Бид дэлгүүр хоршооны хохирлыг ерөнхийд нь гаргасан /нарийн мэдээллийг маргааш өглөө өгнө гэв/. Албан байгууллагуудын байранд учирсан хохирлыг тогтоохоор аймгаас одоо мэргэжилтнүүд ирж байна.

Иргэддээ цахимаар болон утсаар, багийн дарга нараар дамжуулан мэдээлэл өгч байна. Анх 6,8 магнитудын хүчтэй газар хөдлөхөд иргэд их цочирдож байсныг бодвол одоо харьцангуй тайван хандаж байна" гэлээ.