Өнөөдөр Олон улсын хүүхдийн эрхийг хамгаалах өдөр. Энэхүү өдөр үр хүүхдээ хэрхэн баярлуулах гэж байгаа талаар УИХ-ын гишүүн Л.Гундалайтай цөөн хором уулзсан юм.

-Маргааш (өнөөдөр) хүүхдийн баяр болно. Хүүхдүүддээ бэлэг авч амжсан уу?
-Хүүхдүүддээ ордноос өгсөн бэлгийг өгөөд л аргалчихна даа. Манай хүүхдүүд чихэр, ундаа ууж хэрэглэдэггүй. Тийм болохоор нэмж чихэр, жимс авах шаардлагагүй ээ.

-Хүүхдийн баяраараа хүүхдүүдээ хэрхэн баярлуулах төлөвлөгөөтэй байна вэ?
-Хүүхдүүдтэйгээ өглөөний цайгаа хамтдаа ууна. Мэдээж бэлэгнээс нь жаахан өгнө (инээв). Тэгээд гэр бүлээрээ хөдөө явж, агаарт гарна даа.

-Та хүүхэд байхдаа энэ баярыг хэрхэн тэмдэглэдэг байв?
-Биднийг хүүхэд байхад энэ баярыг тэмдэглэдэггүй байсан. Хүүхдийн баяр гэж мэддэг ч үгүй байлаа. Тийм боломж ч байгаагүй байх. Одоогийнх шиг ийм чихэр, жимс элбэг ч байсангүй. Өгдөг хүн нь ч ховор байлаа. Тухайн үед хамгийн гоё баяр нь Улсын наадам, Цагаан сар хоёр л байсан шүү дээ. Өөр баяр тэмдэглэдэггүй байсан.

-Л.Гүндалай хэр сайн аав бэ?
-Аав хүний хувьд хүүхдүүдтэйгээ аль болох хамт удаан байхыг боддог. Хүүхдүүдээ сайн боловсролтой болгохыг нэн тэргүүний зорилтоо болгосон. Үргэлж дэргэд нь суугаад зөвлөж, туслаад байх цаг зав гардаггүй. Амралтын өдөр, ажлын бус цагаар хүүхдүүдтэйгээ тоглох, тэднийгээ эрхлүүлэх, зөв хүмүүжилтэй болгох, олон талын авьяас, мэдлэгтэй болгоход нь анхаардаг. Жаахан ч гэсэн олдож байгаа цагаа аль болох үр өгөөжтэй өнгөрүүлэхийг л хичээдэг дээ.

-Танай гурван настай хүүхдийг англиар ярьдаг гэдэг. Энэ үнэн үү?
-Тийм шүү. Хүүхдүүдээ сайн сургуульд сургадгийн ач гэх үү дээ. Бүх хүүхэд маань англиар ярьдаг. Манай гурван настай хүүхэд хүртэл англиар ярина. Таван настай нь англиар ярина, бичнэ. Би хүүхдүүдээ ном их уншуулах дуртай. Хүүхдүүдээ аль болохоор чөлөөт цагаа зөв өнгөрүүлж сураасай гэж боддог юм. Мэдээж хүүхэд хойно тоглоно, эрхэлнэ. Үүнийг нь зөв зохицуулахыг л хичээнэ. Манай хүүхдүүд харьцангуй эрт унтдаг юм. 20.30 цагт ор руу нь хөтлөөд эсвэл хөөгөөд л оруулна. Амралтын өдөр 22.00 цаг хүргэнэ. Өглөө 07.00 цагт хичээлдээ явдаг. Хичээлийнх нь дараа шатар, бүжгийн дугуйланд явуулдаг.

-Та хүүхдүүдээрээ их бахархдаг бололтой?
-Бахархахын хажуугаар магтана. Гэхдээ гол нь зөв магтдаг. Ингэснээр хүүхэд урам зоригтой болж, хичээл зүтгэл гаргах юм.

Л.Нинжсэмжид http://www.niigmiintoli.mn/