Засгийн газрын хуралдаанаас гаргасан шийдвэрийг танилцуулж байна. Хуралдаанаар: 

• Хөгжлийн банкны үйл ажиллагаа холбогдох хууль тогтоомжид нийцэж байгаа эсэх тухай ээлжит хяналт, шалгалт хийсэн дүнгийн талаар
• 2025 оныг Нийслэлийн дэд бүтцийн хөгжлийг дэмжих жил болгон зарласантай холбогдуулан авах арга хэмжээний талаар
• Нийслэлийн агаарын бохирдлын талаар
• “Хоолны түүхий эдийн зардлыг шинэчлэн тогтоох тухай” Засгийн газрын тогтоолын төсөл /хүүхдийн хоолны зардал/ зэрэг найман асуудал хэлэлцжээ.

Аж үйлдвэрийн сайд Ц.Туваан дараах мэдээллийг өглөө: 

-14 мега төслийн хэрэгжилтийн явцыг танилцуулъя. Эдгээрээс 3 төсөл  эхэлсэн.

Нэг. Эрдэнэбүрэнгийн УЦС-ын санхүүжилтийн гэрээг БНХАУ-тай байгуулан, ажил үргэлжилж байна.  
Хоёр. Ганцмод-Гашуунсухайт боомтын хил холболтын төмөр замын гэрээг хоёр улсын Засгийн газар хооронд байгуулах чиглэлийг УИХ хэлэлцээд, тогтоол батлав.
Гурав. Францын Орано групптэй байгуулах, хөрөнгө оруулалтын гэрээний төслийн эхний хэлэлцүүлгийг УИХ-ын байнгын хороод хэлэлцлээ. Ирэх онд энэ гэрээний төслийг үргэлжлүүлэн хэлэлцэнэ.
Дөрөв. Газрын тос боловсруулах үйлдвэрийг БНЭУ-ын зээлээр барьж байна. Энэхүү томоохон бүтээн байгуулалтын ажлыг дөрвөн хэсэгт бүлэглэсэн. Эхний ээлжийн (EPC1) бүтээн байгуулалтыг улсын комисс хүлээн авсан. EPC4-ийн хүрээнд тус улсаас дахин 450 сая ам.долларын зээл авна. Зээлийн гэрээг УИХ-аар ирэх онд соёрхон батлуулна.
Тав. Ойрын хугацаанд зэс хайлуулах цогцолборыг Засгийн газрын хуралдаанаар хэлэлцсэн. Үйлдвэр технологийн парк байгуулах хуулийн дагуу энэ цогцолборыг Эрдэнэт үйлдвэрийн дэргэд байгуулна. Шинээр ХХК байгуулах, эсэхийг шийднэ. Үүний дараа сонгон шалгаруулалтаа зарлана.    
Зургаа. Гангийн цогцолборыг байгуулах төслийн нэгж байгуулан, энэ ажлыг эзэнжүүлэх талаар өнөөдөр хэлэлцлээ.

БНХАУ-ын "Петрочайна Дачин тамсаг" компани манай улсаас газрын тос олборлодог. Тус компанитай байгуулсан, Бүтээгдэхүүн хуваах гэрээтэй холбоотой, татварын маргаан үүссэн. Үүнийг хурдан шийднэ. Учир нь тус компани ОХУ-аас БНХАУ руу манай нутаг дэвсгэрээр дамжин өнгөрөх байгалийн хийн хоолойг барина. Бид ирэх онд БНХАУ-ын CNPC компанийн удирдлагуудтай очиж уулзана.

Говийг усжуулах төсөл мөн 14 мега төсөлд багтсан. Ганцмод-Гашуунсухайт боомтын төмөр замын хил  холболтын гэрээнд энэ асуудлыг мөн тусгасан. Энэ тогтоолыг өнгөрсөн баасан гарагт батлан, УИХ-ын дарга гарын үсгээ зурсан. Иймд тогтоолыг БНХАУ-ын ЭСЯ-нд яаралтай хүргүүлнэ.  

Бид өмнө нь энэ тогтоолын төслийг БНХАУ-ын Хөгжил шинэтгэлийн хороонд хүргүүлсэн. Намрын чуулганаар амжиж, энэ гэрээг байгуулахаар зорьж байна. Ингэвэл компани хоорондын гэрээг УИХ-ын хаврын чуулганы үед байгуулна. 

Таван толгойн цахилгаан станцыг гацаанаас гаргавал “Оюу толгой” ХХК-ийг цахилгаанаар хангах боломж бүрдэнэ гэв.