Логик паззлын дэлхийн аварга шалгаруулах тэмцээнд БНХАУ-ын Бээжин хотноо 2024 оны 10 дугаар сарын 16-наас 20-ны өдрүүдэд боллоо. Дэлхийн аварга шалгаруулах энэхүү тэмцээнд 25 орны 138 оролцогч 3 өдөр, 21 раундын нийт 317 логик паззл бодож оюун ухаанаараа өрсөлдсөн юм.

Монгол Улсын багийн гишүүдээс U18 ангилалд оролцсон Сүхбаатар аймгийн Баруун-Урт сумын 1 дүгээр сургуулийн 12А ангийн сурагч Адьяажавын Оюун-Эрдэнэ хоёр дугаар байр эзэлж мөнгөн медалийн эзэн боллоо.

Энэ төрөлд Монгол Улс Дэлхийн аваргаас анхны медалийг хүртсэн нь энэ юм.

Дэлхийд 31 дэх удаагаа зохион байгуулагдаж буй энэхүү тэмцээнд Монгол Улс 3 дахь удаагаа баг тамирчдаа илгээж байгаа бөгөөд шинэхэн оролцогчдын хувьд багийн үзүүлэлт болон хувийн оноогоор ОУ-ын туршлагатай баг тамирчдыг гайхуулан халуун алга ташилт дор Монгол Улсынхаа нэрийг дуудуулж, Монгол хүний оюун ухааныг дэлхийд гайхуулан амжилттай оролцож ирсэн багийн нийт гишүүддээ халуун баярыг хүргэе.
Логик паззл буюу тааварт бодлого нь хэл, соёлын ялгаатай байдлаас хамаарахгүй, салбарын нарийн мэдлэг шаардахгүй, тогтсон томьёо теорем ашиглахгүйгээр зөвхөн цэвэр логик сэтгэлгээ, оюун ухаанаа ашиглан шийдэх бодлого, тааврууд юм.

Оюуны чадварын IQ төв 2020 онд Дэлхийн паззлын холбоонд (ДПХ-World Puzzle Federation) Монгол улсыг төлөөлөн албан ёсны 40 дэх гишүүн орноор элссэнээр монголын паззл сонирхогчдод дэлхийн аварга шалгаруулах тэмцээнд оролцож, цэвэр логик сэтгэлгээгээ орон орны шилдгүүдтэй сорин өрсөлдөх боломж нээгдсэн юм.
Монгол Улсын логик паззл сонирхогчид 2022 онд Польш улсын Краков, 2023 онд Канад улсын Торонто, 2024 онд Бээжин хотод зохион байгуулагдсан 31 дэх удаагийн Логикийн паззлын дэлхийн аварга шалгаруулах тэмцээнүүдэд амжилттай оролцоод байна.

Оюуны чадварын IQ төвөөс Монгол Улсыг төлөөлөн оролцох багийн гишүүдийн шалгаруулах зорилгоор 2 үе шаттай “Олон Улсын Логик Паззл”-ын уралдааныг жил бүр нээлттэй зохион байгуулж ДАШТ-д оролцох баг тамирчдыг шалгаруулдаг байна.
Энэ жилийн хувьд 3 болон 5 дугаар саруудад 21 аймаг 9 дүүргээс нийт 7300 гаруй логик паззл сонирхогчид “Олон Улсын Логик Паззл”-ын уралдаанд оролцож оюун ухаанаараа өрсөлдөж ДАШТ-д Монгол улсыг төлөөлөн оролцох багийн 8 гишүүнийг шалгаруулсан билээ.

ДАШТ-д ЕБС-ийн дунд, ахлах ангийн сурагчид, насанд хүрэгчид оролцох боломжтой бөгөөд ганцаарчилсан болон багийн төрлөөр өрсөлддөг.
Тэмцээнд дэлхийн олон орны паззл сонирхогчид болох логикчид, математикчид, хуульчид, аналистууд, инженерүүд, програмистууд, код шифр тайлагчид зэрэг олон мэргэжлийн төлөөллүүд, ЕБС-ийн сурагчид өрсөлдөж, оюун ухаанаа сорьдог ажээ.