Засгийн газрын хуралдаанаар хэлэлцсэн асуудлын талаар мэдээлж байна. ЗГХЭГ-ын дарга Н.Учрал "ЭТТ" ХК-ийн 2024 оны ногдол ашгийг иргэдэд шилжүүлсэн эхэлсэн гэв.

-“Эрдэнэс Тавантолгой”-н хувьцааны ногдол ашгаа Хуримтлалын санд шилжүүлэх, хандивлах сонголт хийсэн иргэдийн саналыг дахин баталгаажуулна.

Засгийн газрын энэ сарын 19-ний хуралдаанаас “Эрдэнэс Тавантолгой” ХК-ийн 2024 оны цэвэр ашгаас ногдол ашиг хуваарилахыг танилцуулж, ногдол ашгийг бэлнээр авах, эсхүл хуримтлуулах, хандивлах эсэх талаар нь иргэдээс санал авч, хэсэгчлэн олгохыг даалгасан.

Ногдол ашгийг иргэд хуримтлалын нэрийн дансандаа шилжүүлэх, төрөлжсөн сан хооронд шилжүүлж хуримтлуулах, арвижуулах нөхцөлийг бий болгох, Үндэсний баялгийн сангийн Хуримтлалын сан дахь иргэдийн нэрийн дансны орлогын мэдээллийг виртуал карт, хадгаламжийн дэвтэр, бусад хэлбэрээр иргэдэд хүргэх асуудлыг судлан хэрэгжүүлэхийг даалгасан юм. 

Санал асуулгад 505,318 иргэн оролцсоноос 

• 481,809 нь  “Бэлэн мөнгө”, 
• 22,242 нь “Хуримтлалын сан”, 
• 1,267 иргэн “Хандив” гэсэн сонголт хийжээ. 

“Хуримтлалын сан”, “Хандив” гэж  санал өгснөөс бусад иргэнд ногдол ашиг олгоход бэлэн болсон. “Эрдэнэс Тавантолгой” ХК-ийн энгийн хувьцааны ногдол ашгаа Хуримтлалын санд шилжүүлэх, хандивлах сонголт хийсэн иргэдийн саналыг дахин баталгаажуулахыг холбогдох албан тушаалтнуудад даалгалаа.

1267 иргэн агаарын бохирдол, нийслэлийн түгжрэлийг бууруулахад ногдол ашгаа зарцуулах буюу нийгмийн төсөл хөтөлбөрт хандивлах сонголт хийжээ.

Хэрэв та санал асуулгад оролцоогүй бол таны ногдол ашгийг данс руу тань шууд шилжүүлэх юм. Цаашид бид хандлагаа өөрчилж, Хуримтлалын санд хадгалдаг болох нь зөв гэж Н.Учрал сайд хэлэв. Энэ хуримтлалыг Монголбанкны бодлогын хүүгээр тооцон өсгөх юм байна.     

Үндэсний баялгийн санг олон улсын жишээр Хөрөнгө оруулалтын тухай хуулийн дагуу мэргэшсэн, хөрөнгө оруулалтын компани удирдах нь зөв. Иймд Үндэсний баялгийн сангийн тухай хуулийг өөрчлөхөөр ажлын хэсэг байгуулан ажиллаж байна гэв.