Өнөөдөр Монголын бизнес, санхүү, хөрөнгийн зах зээлийн салбарт онцлон тэмдэглэхүйц үйл явдал тохиож байна. Тодруулбал, санхүүгийн салбарын тэргүүлэгчдийн нэг Инвескор Санхүүгийн Групп нь Лондоны хөрөнгийн бирж (LSE)-д бүртгэлтэй Монголын анхны санхүүгийн компани болж чадлаа. Энэхүү хөрөнгийн бирж дээр бидний сайн мэдэх AstraZeneca, Shell, HSBC Holdings, Unilever, Rio Tinto зэрэг дэлхийн шилдэг компаниуд бүртгэлтэй байдаг.

Түүхэн үйл явдлын эзэн Инвескор Санхүүгийн Групп нь 2016 онд байгуулагдсан бөгөөд санхүүгийн зах зээлд шинэлэг бүтээгдэхүүн, дэвшилтэт технологи, шилдэг менежментийг нэвтрүүлэгч байгууллага юм. Монголоос олон улсын зах зээлд санхүү, технологийн экспорт хийж буй тус групп нь одоогийн байдлаар 8 улсад 14 салбар компанитай. 

Харин Лондоны хөрөнгийн бирж нь 1801 онд албан ёсоор байгуулагдсан, 200 гаруй жилийн түүхтэй дэлхийн нөлөө бүхий хөрөнгийн биржүүдийн нэг юм. Сонирхуулахад, энэхүү хөрөнгийн биржийн үүсэл нь тэртээ 1698 онд Jonathan’s Coffee House нэрээр үйл ажиллагаа явуулж байсан хөрөнгө оруулагчдын уулзалтын цэгтэй салшгүй холбоотой.

Олон зуун жилийн турш Их Британи болон Европын орнуудын худалдаа наймааны гол төв байсаар ирсэн уг биржид өнөөдрийн байдлаар 1,700 гаруй компани (40 гаруй хувь нь Их Британиас бусад улсын компаниуд) хувьцаагаа арилжаалж байгаа бөгөөд эдгээр компаниудын нийт зах зээлийн хэмжээ нь ойролцоогоор 3.5 их наяд ам.доллар юм. Энэ үзүүлэлтээрээ Лондоны хөрөнгийн бирж нь дэлхийн шилдгүүдийн тоонд Нью-Йорк, Хонконг, Токио, Шанхай хотын хөрөнгийн биржүүдтэй хамт зүй ёсоор багтдаг.

Өдөр бүр хагас сая арилжаа хийгддэг Лондоны хөрөнгийн бирж нь тун өндөр шалгуур, нарийн хяналттай биржүүдийн нэг бөгөөд компанийн засаглал, менежментийн тогтолцоо, санхүүгийн тогтвортой байдал, хууль зүйн нийцэл, эрсдэлийн менежментийн үе шат зэргийг харгалзан үздэг. Түүнээс гадна компаниуд уг бирж бүртгэгдэхийн тулд Их Британийн Санхүүгийн зохицуулах газраас зөвшөөрөл авах хэрэгтэй болдог.

Инвескор Санхүүгийн Групп эдгээр өндөр шалгуурыг давж, Монголоос анх удаа Лондоны хөрөнгийн биржид албан ёсоор бүртгэгдсэнээр олон улсын хөрөнгө оруулагчдад Монголын санхүүгийн зах зээлд хөрөнгө оруулах боломжийг нээхээс гадна компанийн үйл ажиллагаагаа олон улсын түвшинд өргөжүүлэх боломжтой болж байна. Түүнчлэн энэхүү үйл явдал нь Монголын санхүүгийн салбарын хөгжилд шинэ хуудас нээж, бусад компаниудад олон улсын зах зээлд гарах урам зориг, үүд хаалга нээж өгөх юм. 

Web site: https://www.ic-fg.com/