Турк, Сирид аврах ажиллагаа үргэлжилсээр байна. Газар хөдлөлт болсноос бараг долоо хоног өнгөрсөн ч аврагчид эсэн мэнд үлдсэн хүн олсоор байгаа ч найдвар улам багассаар байна.

Аймшигт газар хөдлөлт болсноос хойш 139 цаг буюу зургаа хоногийн дараа Туркийн өмнөд хэсэгт нурангин дороос долоон сартай хүүхэд аварчээ. Хамза нэртэй хүүг бямба гарагт аварсан байна. Аврагчид ямар их баярлаж бие бие тэвэрч байгаа нь бичлэгт үлджээ.

Хатая мужийн бас нэгэн хотод нуранги дороос 12 настай Кади охиныг аварчээ. Охин нурангин дор 147 цаг байсан аж.

Туркийн эрх баригчид нурсан барилгуудтай ямар нэг байдлаар холбоотой хүмүүсийг баривчлах 113 хүсэлт гаргасан тухай мэдээлжээ.

Түүнчлэн Туркийн хэвлэл мэдээллийн хэрэгслүүд Газиантеп хотод 13 настай охиныг аварсан тухай мэдээлж, гайхамшигтай үйл явдал тохиолоо гэсэн байна. Аав охин хоёрыг мөн нуранги дороос гаргаж авчээ. Аав нь "хоёр аяга сайхан цай уумаар байна" гэж хэлсэн тухай нэгэн аврагч дамжуулсан байна.

Турк, Сирид амиа алдагсдын тоо 33 мянга даваад байна. Сири улс баасан гарагаас хойш амиа алдагсдын тоогоо шинэчлэн зарлаагүй тул үүнээс ч олон байх магадлалтай гэж үзэж буй. Цаг явах тутам нуранги дороос амьд мэнд үлдсэн хүн олох найдвар буурсаар байна.

Туркийн эрх баригчид нурсан барилгуудтай ямар нэг байдлаар холбоотой хүмүүсийг баривчлах 113 хүсэлт гаргасан тухай мэдээлжээ. Одоогоор 12 хүн саатуулагдаад байна.

Үүний зэрэгцээ Сирийн аврагчид гамшгийн эсрэг олон улсын арга хэмжээг шүүмжилжээ. НҮБ-ын Хүмүүнлэгийн асуудал эрхэлсэн Ерөнхий нарийн бичгийн даргын орлогч бөгөөд Онцгой байдлын асуудал эрхэлсэн зохицуулагч Мартин Гриффитс "Дэлхий нийт Сирийн баруун хойд нутгийн ард түмнийг мартсан" гэж мэдэгдэв. Тэрээр "Тэд өөрсдийгөө хаягдсан гэдэгт итгэлтэй байна. Тэд олон улсын тусламжийг хүлээж байсан ч ирсэнгүй" гэжээ.

Эх сурвалж: ВВС