Өнгөрсөн амралтын өдрүүдэд эхэлсэн жагсаалын үед гарсан зөрчлүүдэд ямар арга хэмжээ авсан талаар ЗГ-ын хуралдааны шийдвэрийг танилцуулах үеэр сэтгүүлчид ХЗДХ-ийн сайд О.Алтангэрэлээс тодрууллаа.

Сайд О.Алтангэрэл, Нэгдүгээр сарын 11, 12-нд Монгол Улсын иргэд үзэл бодлоо илэрхийлэх эрхийнхээ дагуу жагссан. Үүнд нь Монгол Улсын Засгийн газар хүндэтгэлтэй хандаж байна. Иргэд үзэл бодлоо чөлөөтэй илэрхийлэх эрх чөлөөнийхээ хүрээнд жагссан. Үүний хажуугаар хууль зөрчсөн үйлдлүүд гарсан.

Тухайлбал, 11-р сарын 12-ны өдөр иргэн Б.Цацралыг зодсон байж болзошгүй гэх асуудлыг Цагдаагийн байгууллагаас шалгаж байгаа. Иргэн Б.Цацрал одоогийн байдлаар Цагдаагийн байгууллагад ямар нэг гомдол гаргаагүй. Нийтийн сүлжээнд тавигдсан мэдээлэл, бичлэгт үндэслэн бусдын эрх чөлөөнд халдсан байж болзошгүй гэсэн үндэслэлээр тус хүмүүсийг шалгаж байна.

Жагсаалын үеэр талбай руу машинтай дайрч орж ирсэн этгээд өмнө нь хүнийг санаатай адах гэмт хэрэгт ял шийтгэгдэж байсан. Хоёр жилийн өмнө хорих байгууллагаас суллагдсан иргэн байсан. Хэрэв олон хүнийг дайрсан бол яах вэ? гэдэг үндэслэлээр шалгаж байгаа.

Олон нийтийн мэдээллийн сүлжээнд албан хаагчдыг хутгалах мэт үйлдэл үзүүлж, албан хаагчидтай зүй бус харьцсан этгээдийг мөн шалгаж байна. Энэ этгээд өмнө нь дөрвөн удаа ял шийтгэгдэж байсан.

Жагсаал цуглаан зохион байгуулах журмын тухай хуульд төлбөртэй жагсаал хийхийг хориглодог. Нийгмийн бухимдал, үзэл бодлоо илэрхийлэх гэж органикаараа маш олон хүн ирсэн. Үүний хажуугаар мөнгө тараасан, тодорхой үйлдэл хийхийг албадсан байж болзошгүй үйлдлүүдийн дагуу хэд хэдэн хүн шалгагдаж байна.

Жагсаалын үеэр тавьсан иргэдийн шаардлагын хүрээнд дүгнэлт хийх, санал танилцуулах үүрэг бүхий ЗГХЭГ-ын дарга Н.Учралаар ахлуулсан ажлын хэсгийг өнөөдөр байгуулсан. Ажлын хэсэгт миний бие орсон. Шаардлагын дагуу авах арга хэмжээг ЗГ-ын хуралдаанд танилцуулна гэлээ.