“Оюу толгой” компани 2024 оны дөрөвдүгээр улирлын тайлангаа танилцуулав.

Өнгөрсөн онд тус компани үндэсний компаниудтай хийсэн худалдан авалт, бусад хамтын ажиллагаа, төсөвт төлж буй татвар, хураамж, үндсэн ажилчдын цалинд нийт 7 их наяд төгрөг дотоодод зарцуулжээ. “Оюу толгой”-н 30 ханган нийлүүлэгч компани мөн ТОП 100 аж ахуйн нэгжийн жагсаалтад багтсан байна.

Гүний уурхайн бүтээн байгуулалтын нэн чухал хэсэг болох Агааржуулалтын хойд амын нэвтрэлт 1,175 метр, урд амын нэвтрэлт 1,131 метрт тус тус хүрчээ. Ингэснээр үндсэн нэвтрэлтийн ажил амжилттай дууссан байна.

Босоо ам нь гүний уурхайд агаар оруулах, гаргах үүрэгтэй. Мөн уурхайн үйлдвэрлэл бүрэн хүчин чадалдаа хүрэх боломжийг бий болгох юм. Тус бүр 10, 11 метрийн диаметр бүхий эдгээр агааржуулалтын ам нь дэлхийд хамгийн томд тооцогддог.