НИТХ-ийн өнөөдрийн ээлжит бус VII хуралдаанаар Нийслэлийн Засаг дарга бөгөөд Улаанбаатар хотын захирагчид нэр дэвшигчийг сонгоно. 

Нийслэлийн МАН-аас НИТХ-ын дарга С.Амарсайханыг нэр дэвшүүлсэн бол С.Мөнхчулуун өөрийн нэрийг дэвшүүлэв. Мөн хуралдааны танхимаас НИТХ-ын төлөөлөгчид Засаг даргад  нэрээ дэвшүүлэх боломжтой ч нэр дэвшүүлэх байсангүй.  Хуралдаан 12.30 цагт эхэлнэ. 

Хуралдаан 11.30 цагт эхэлсэн боловч НИТХ дахь АН-ын бүлгийн дарга Ц.Баатархүү нэг цагийн завсарлага авах горимын санал гаргасныг хуралдааны дэгийн дагуу ёсоор болголоо. 

НИТХ-ын төлөөлөгч Д.Баттулга: Ерөнхий сайд яагаад үндэслэлээ тайлбарлахгүйгээр өмнөх нэр дэвшигчээс татгалзаж байгаа юм. Энэ бол цаашид буруу жишиг тогтоож байна. 

Э.Бат-Үүл: Ерөнхий сайдыг татгалзах үндэслэлээ ирж тайлбарлах шаардлагатай гэсэн томъёоллоор санал хураалт явуулах санал гаргав. Санал хураалт явуулахад НИТХ-ын гишүүдийн олонхийн дэмжлэг авсангүй. 

С.Мөнхчулуун: Би өөрийн нэрийг Засаг даргад дэвшүүлэн өрсөлдөж байна.

Санал хураалт нууцаар явагдана. 

НИТХ-ын хуралдаанаар Хотын даргад нэр дэвшигчийг тодруулах санал хураалт болж, олонх буюу 25 төлөөлөгчийн саналаар НИТХ-ын дарга С.Амарсайхан Улаанбаатар хотын Засаг даргаар сонгогдлоо. Түүний өрсөлдөгч С.Мөнхчулуун 19 төлөөлөгчийн санал авсан байна. Санал хураалтад НИТХ-ын 45 төлөөлөгч бүрэн оролцсон бөгөөд 44 хуудас хүчинтэй тооцогдлоо. 

НИТХ-аас  Улаанбаатар хотын Засаг даргаар С.Амарсайханы нэрийг батламжлуулахаар хүргүүлэх бөгөөд Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуульд зааснаар хоёр дахь нэр дэвшигчийг Ерөнхий сайд татгалзахгүй батлах зохицуулалттай. Тэгэхээр хуульд зааснаар С.Амарсайхан Улаанбаатар хотын Засаг даргаар ажиллахаар болж байна.