Өчигдөр болсон Засгийн газрын ээлжит хуралдаанаар “Зарим газар нутгийг улсын тусгай хамгаалалтад авах, хилийн заагт өөрчлөлт оруулах тухай” УИХ-ын 2020 оны 46 дугаар тогтоолыг хэлэлцэв. 

Тусгай хамгаалалттай газар нутгийн хилийн заагийг батлах асуудал таван жилийн турш найман удаа Засгийн газрын хуралдаанаар орсон ч шийдэгдээгүй өнөөдрийг хүрсэн. 

Энэ удаагийн хуралдаанаар байгалийн нөөц болон дурсгалт газрын хилийн зааг буюу эргэлтийн цэгт ашиглалтын болон хайгуулын тусгай зөвшөөрлийн талбай, өвөлжөө, хаваржааны давхцалтай хэсгийг хасаж, нийт 19 газрын хилийн заагийг баталлаа. 

Ийн тусгай хамгаалалттай газар нутгийн хэмжээ 1.5 хувиар нэмэгдэж, нийт нутаг дэвсгэрийн 20.8 хувь буюу 32.5 сая га талбай хамгаалалтад хамрагдах боломж бүрдэв.

Монгол Улс 1992 онд батлагдсан “Биологийн олон янз байдлын конвенц”-д нэгдэн, газар нутгийнхаа 30 хувийг тусгай хамгаалалтад авах амлалт өгсөн анхны улс болсон. Тус зорилтыг “Алсын хараа–2050” хөгжлийн бодлогод тусган 2030 он гэхэд 30 хувь, 2050 он гэхэд 35 хувьд хүргэхээр заасан билээ.