Төрийн албан хаагчийн есөн хувийн цомхотгох бодлогын хүрээнд орон нутагт албан хаагчдыг улс төрийн харьяаллаар халах, чөлөөлөх асуудал гарч байгааг өнөөдөр /2025.09.17/ УИХ-ын чуулганы нэгдсэн хуралдааны үеэр УИХ-ын зарим гишүүн хөндөв.

Энэ асуудлаар Сангийн сайд Б.Жавхлан, “Монгол Улсын хөгжлийн 2026 оны төлөвлөгөө”-нд төрийн албан хаагчийн тоог есөн хувиар бууруулна гэж тусгасан. Үүнийг 2025 оны төсвийн тодотголыг хэлэлцэх үед хэрэгжүүлж эхэлсэн. Хэрэгжүүлэхдээ орон нутагт төсвийн ерөнхийлөн захирагч, аймгийн удирдлагууд улстөржсөн байдлаар хандсан тохиолдлууд байгаа тухай бичиг ирж байна. Ингэж болохгүй гэв.

Төрийн албан хаагчийн есөн хувийг цомхотгох бодлогын хүрээнд 12800 албан хаагчийн ажлын байрны асуудал яригдана. Энэ бодлогыг хэрэгжүүлэхдээ шууд цомхотгоно гэхээс илүү:  

• Өндөр насны тэтгэвэрт гарсан хүний орон тоон дээр аль болох нэмж хүн авахгүй байх
• Сул орон тоо байгаа бол нэмж хүн авахгүй байх
• Ажилдаа хариуцлагын алдаа гаргасан албан хаагчид сахилгын арга хэмжээ авч, чөлөөлөх
• Ажлын чиг үүргийн давхардлыг арилгаж, нягтруулах, цахимаар гүйцэтгэж болох орон тоог цомхотгох зэргээр ажлын байранд дарамт үүсгэхгүй байдлаар шийдвэрлэх чиглэл өгсөн. 

Энэ бодлогын үр дүнд хэчнээн албан хаагч чөлөөлөгдсөн тоо нь ЗГХЭГ-т нэгтгэгдэж байгаа. ЗГХЭГ-аас дарга нарын тоо бууруулах хүрээнд төрийн өмчит компаниудын удирдлагын орон тоог 200-гаар цөөлж, 11.5 тэрбумын зардал хэмнэлээ гэж Ерөнхий сайд Г.Занданшатар өнгөрсөн даваа гарагт УИХ-ын чуулганд танхимаас мэдээлсэн юм.