Засгийн газрын өнөөдрийн /2025.10.15/ хуралдаанаар Монгол Улсын Засгийн газар, Бүгд Найрамдах Казахстан Улсын Засгийн газар хоорондын Тэтгэврийн асуудлаар хамтран ажиллах тухай хэлэлцээрийг  соёрхон батлах тухай хуулийн төслийг хэлэлцэж, УИХ-д өргөн мэдүүлэхээр боллоо. 

Монгол Улсын Засгийн газар нь хилийн чанадад оршин сууж байгаа иргэдийн нийгмийн баталгааг хангах зорилгоор Монгол Улсын иргэд олноор ажиллаж амьдардаг гадаад улс орнуудтай  нийгмийн хамгааллын хэлэлцээр байгуулан ажилладаг. 

Энэ хүрээнд Монгол Улсын Засгийн газар, Бүгд Найрамдах Казахстан Улсын Засгийн газар хоорондын Тэтгэврийн асуудлаар хамтран ажиллах тухай хэлэлцээрийг Улаанбаатар хотноо 2024 оны 10 дугаар сарын 29-ний өдөр байгуулсан бөгөөд Монгол Улсын Их хурал соёрхон баталснаар хэрэгжинэ.

Ингэснээр хоёр улсын иргэд Монгол Улс болон Бүгд Найрамдах Казахстан Улсад ажилласан, шимтгэл төлсөн хугацааг нэгтгэн өндөр насны тэтгэвэр тогтоолгох, Монгол Улсын иргэд БНКУ-аас хуримтлалын тэтгэврийг тогтоолгон авах боломж бүрдэж, тухайн хүний ирээдүйн нийгмийн баталгаа сайжрах юм. 

Гадаад харилцааны яамны мэдээллээр БНКУ-д Монгол Улсын 8000 гаруй иргэн оршин сууж байгаагаас 3100 гаруй иргэн албан ёсоор ажил хөдөлмөр эрхэлж байна. Харин Монгол Улсад БНКУ-ын 560 орчим иргэн оршин сууж байна.