Улсын их хурлын зарим гишүүн буюу Д.Энхтүвшин, Б.Чойжилсүрэн, Д.Батлут, Н.Учрал, Ч.Ундрам, Ж.Мэндсайхан, Б.Жавхлан, Ж.Энхбаяр, Б.Батцэцэг, Н.Батшугар тэргүүтэй гишүүд УИХ-ын дарга Д.Амарбаясгаланг бүрэн эрхээ түдгэлзүүлж, хуулийн байгууллагад шалгуулж, олон нийтийн төөрөгдлийг тайлахыг хүслээ. 

Мэдэгдэл хийсэн гишүүд бүгд ижил агуулгатай зүйл хэлсэн тул УИХ-ын гишүүн Д.Энхтүвшиний ярианаас онцолбол: 

- Сүүлийн үед улс төрийн хүрээнд болж буй үйл явдлаас болж үндэсний эв нэгдэл, төрийн ажиллагаа тасалдаж, ард иргэдийн төрд итгэх итгэлийг сулруулж байна. 

Тиймээс УИХ-ын дарга Д.Амарбаясгаланг "Та нэр холбогдоод байгаа асуудлуудаа хуулийн байгууллагуудаас шалгуулаач ээ" гэсэн ёс зүйн шаардлагыг хүргүүлж байна. Энэ шаардлага ч анхных биш. АН-ын бүлэг ч энэ шаардлагыг тавьсан. Уг асуудлаас улбаалаад нийгэмд тодорхойгүй байдал үүсгэх нь хувь хүний хувьд ч, улс эх орны асуудалтай холбоотой учир өөрөө сайн дураар шалгуулаасай гэж бид хүсэж байна. Харин энэ шаардлага бол түүнийг огцруулах талаар биш юм. УИХ-ын дарга, гишүүний бүрэн эрхээсээ түдгэлзэж, нэр холбогдоод байгаа авилга, албан тушаалын гэмт хэргийн шинжтэй байж болзошгүй асуудлыг хуулийн дагуу шалгуулах ёс зүйн шаардлагыг хүргүүлж байна гэлээ.