УИХ-ын гишүүн О.Амгаланбаатар “Мансууруулах эм, сэтгэцэд нөлөөт бодисын тухай хуульд шинэчилсэн найруулга оруулах” хуулийн төсөл санаачилж буй талаараа мэдээллээ. 

Тэрбээр "Би өнгөрсөн 6 сарын хугацаанд Мансууруулах эм, сэтгэцэд нөлөөт бодисын тухай хуульд шинэчилсэн найруулга оруулах” хуулийн төслийн судалгааг хийж, бэлэн болголоо. Уг хуулийн төсөлд Засгийн газраас санал авах бичгээ өнөөдөр албан ёсоор явуулж байна. Нэг сарын дараа санал ирсний дараа УИХ-д өргөн барих учир цаг хугацааны хувьд Хаврын чуулган эхлэх үед өргөн барьж таарна.

Хар тамхи хадгалсан, тээвэрлэсэн, зохион байгуулсан хүмүүст тэнсэнгүй, өндөр ял оноох гэх зэргээр ялыг чангарууллаа. Албадан эмчилгээнд төрийн зардлаар биш ар гэрээс нь, өөрийнх нь зардлаар хамруулдаг байх гэх мэт заалтуудыг нэмсэн.

Монгол Улсад хар тамхи, мансууруулах бодисын хэрэглээний нөхцөл байдал хурцадмал байдалтай болсон. Судалгаагаар нас нь залуужжээ. 23 жилийн өмнө гарсан хуулиар өнөөгийн нөхцөл байдлыг зохицуулах боломжгүй болсон. Зөрчлийн хуулиар торгуулах болон баривчлуулах хариуцлага тооцож байна. Өнөөдрөөс 100 гаруй жилийн өмнө буюу 1911 онд Да хүрээ хар тамхинд нэрвэгдсэн түүх бий. 

Гэтэл өнөөдөр хар тамхины эсрэг тухай хууль сул байна. Тодруулбал ял авч байгаа тохиолдолд зөвхөн "хадгалсан" гэдэг зүйл анги байна. Гэтэл угтаа хар тамхийг тээвэрлэсэн, нэвтрүүлсэн, зохион байгуулсан, өөгшүүлэн дэмжсэн алба хаагчид гэх мэт холбогдоно. Бидний залуу хойч үед хар тамхинд живэх юм бол Монгол Улсын ирээдүй үнэхээр бүрхэг болно. Хуулийн төсөлд хар тамхины наймаанд оролцсон хил гаалийн ажилтан, цагдаа гэх мэт төрийн албан хаагчдын ял хоёр дахин өндөр байхаар заасан. Мөн бусад ялыг нэмсэн. Хэрэглэгч нь зөвхөн зөрчлийн хуулиар биш эрүүгийн хуулиар шийтгэгдэж эхний удаад 5 жил, давтан бол 8 жилийн ял оноох, хадгалсан, тээвэрлэсэн, зохион байгуулсан хүмүүст тэнсэнгүй, өндөр ял оноох гэх зэргээр ялыг чангарууллаа. Албадан эмчилгээнд төрийн зардлаар биш ар гэрээс нь, өөрийнх нь зардлаар хамруулдаг байх гэх мэт заалтуудыг нэмсэн.

Энэ хууль чанга байснаар Монголын ирээдүй хар тамхи, сэтгэцэд нөлөөлөх бодисоос аврагдана. Өмнө нь дамжин өнгөрдөг байсан бол үйлдвэрлэгч, хэрэглэгч улс болсон байна. Тэр дундаа дэлхий нийтэд хориотой, хамгийн аюултайг нь ч хэрэглэдэг болжээ. Тиймээс бид энэ талаарх судалгааг 6 сарын хугацаанд яаралтай хийж дуусгаад, Засгийн газраас санал авах хүсэлтээ өнөөдөр явуулж байна" гэсэн юм.