Өнгөрсөн хэдэн жилийн хугацаанд телеком салбарын өрсөлдөөн улам бүр ширүүсэн, хэрэглэгчийн хэрэгцээ урьдынхаас өргөн хүрээтэй болж байна.

Дуудлага, мессеж, дата үйлчилгээ давамгайлж байсан үе ард үлдэж, операторууд хэрэглэгчийн өдөр тутмын амьдрал, хэрэглээ, амралт чөлөөт цагтай илүү уялдсан багц бүтээгдэхүүн санал болгох стратеги руу шилжжээ. Энэ нь салбарын өрсөлдөөнийг зөвхөн сүлжээний чанар бус, хэрэглэгчийн амьдралын хэв маягийг дэмжих экосистем бүтээх түвшинд хүргэсэн байна.

Дэлхийн том операторууд энэхүү шилжилтийг манлайлан хэрэгжүүлж буй. Жишээлбэл, АНУ-ын Verizon олон улсын стримингийн Disney+, Hulu, ESPN+ зэрэг платформуудыг багцдаа нэгтгэж, хэрэглэгч нэг багцаар кино, спорт, хүүхдийн контент зэрэг өргөн сонголттой орчинд хандах боломжтой. Хэрэглэгч олон төлбөрийг салангид төлөх шаардлагагүй болж, дижитал контентын хэрэглээгээ нэг дор төвлөрүүлэх давуу талыг үүсгэв.

Европын Vodafone мөн энтертайнмент чиглэлийн үйлчилгээг багцууддаа нэгтгэн, Spotify, Amazon Prime Video зэрэг өргөн хэрэглээний платформуудыг санал болгодог. Аяллын эрэлт ихтэй Европын хэрэглэгчдэд зориулсан олон улсын дата роуминг ашиглалтын уян хатан нөхцөл нь тус операторын өрсөлдөх гол давуу тал хэвээр байна.

АНУ-ын US Mobile илүү дижитал хэрэглээнд төвлөрсөн загвар сонгож, PlayStation Plus, Xbox Game Pass зэрэг тоглоомын платформуудтай уялдсан багцуудаа санал болгодог. Энэ нь стримингээс гадна интерактив контентын хэрэглээ эрэлттэй болсныг илтгэнэ.

Эдгээр жишээнээс харахад дэлхийн телеком салбарын өрсөлдөөн улам бүр контент+амьдралын хэв маяг+дата гэсэн гуравласан загвар руу чиглэж, багцууд хэрэглэгчийн амьдралын хэв маягт нийцэх нь хамгийн том давуу тал болов.

Монголын зах зээлд ч энэ чиг хандлага хүчтэй мэдрэгдэж байгаа бөгөөд Мобиком Корпораци “Миний Моби” багцаа шинэчлэн, ярианы эрхээ өөрсдөө бүрдүүлэх уян хатан боломж, VOO стримингийн ТВ суваг, кино, олон ангит контентуудыг үнэгүй ашиглах эрх, Mobilife-ийн 3–4 сая төгрөгийн хорт хавдрын хамгаалалт, мөн интернетгүй үед ч Монгол уран бүтээлчдийн хөгжмийг сонсох боломжтой Sonsy стримингийн эрх дагалдаж багцыг илүү уян хатан, үр ашигтай ашиглах нөхцөлийг бүрдүүлж байна.

Дэлхийн олон оператор нэмэлт үйлчилгээний голлох хэсгийг контентоор дүүргэдэг бол Мобиком хэрэглэгчийн сэтгэл амар байдлыг дэмжих хорт хавдрын хамгаалалтыг багцын үндсэн бүрэлдэхүүнд оруулснаараа салбарын нийтлэг трендээс тодорхой ялгарав. Энэ нь энтертайнмент  хэрэглээ давамгайлсан багцуудын дунд амьдралын чанарыг бүх талаар хангахыг зорьсон шинэ эрэл хайгуул гэж болно.

Түүнчлэн багцад дагалдаж буй Sonsy хөгжмийн үйлчилгээ нь монгол уран бүтээлчдийн дуу хөгжмийг илүү өргөн хүрээнд, өндөр чанартай хүргэх дижитал экосистем болж буйгаараа онцлог. Оффлайн сонсолт, өндөр чанартай аудио зэрэг функц нь хэрэглэгчийн өдөр тутмын хөгжмийн хэрэглээг илүү хүртээмжтэй болгоход нөлөөлж байна. Үүний зэрэгцээ үндэсний контентын хэрэглээг дэмжсэн чиглэл нь олон улсын хөгжмийн платформуудаас ялгарч байна.

Эдгээр өөрчлөлтүүд салбар нэг зүг рүү чиглэж буйг илтгэнэ:

Телеком операторууд зөвхөн харилцаа холбооны үүргээс хальж, хэрэглэгчийн амьдралын чанар, хэрэгцээ, сэтгэл амар байдлыг цогцоор нь дэмжих рүү шилжлээ. Шинэ үеийн багцууд зөвхөн дата, яриа, стримингийн хослол бус, хэрэглэгчийн амьдралыг бүх талаас нь ойлгосон илүү тэнцвэртэй экосистем болон хувирч байна.