"Улаанбаатар трам” төслийн I, II шугамын ТЭЗҮ-ийг Зам тээврийн яамны Шинжлэх ухаан технологийн зөвлөлөөр өнөөдөр /2025.07.07/ хэлэлцэж дэмжлээ. Тус ТЭЗҮ-ийг өмнө нь Зам, тээврийн яамны Төмөр замын дэд зөвлөлөөр хэлэлцэн дэмжиж, мөн яамны Хөгжлийн төвөөр магадлуулсан бөгөөд ийнхүү мэргэжлийн зөвлөлөөр үе шаттайгаар батлагдаж байна.

“Улаанбаатар Трам” төслийг нийслэлд хоёр чиглэлд хэрэгжүүлэхээр төлөвлөсөн. Нэгдүгээр шугам нь Зуслангийн бүсээс (Зунжин худалдааны төв) Сүхбаатарын талбай чиглэлд, хоёрдугаар шугамыг  Архивын ерөнхий газраас Сүхбаатарын талбай чиглэлд хэрэгжүүлэхээр төлөвлөсөн. Хотын хөнгөн төмөр замын тээврийн нэг төрөл болох энэхүү  төслийн нэгдүгээр шугамын урт нь 11 км хос шугам,  нийт 16 зогсоолтой байх бол хоёрдугаар трасс нь 15 км урттай, нийт  23 зогсоол бүхий хос шугам байх юм.

“Улаанбаатар трам” төсөл нь 100 хувь цахилгаан буюу эко, их багтаамжийн нийтийн тээврийн систем бөгөөд авто замын түгжрэл, автомашины хорт утаа ялгаруулалтаас үүсэх агаарын бохирдлыг бууруулах ач холбогдолтой. Дээрх хоёр шугам дагуу төсөл хэрэгжсэнээр авто замын хөдөлгөөний дундаж хурд  25.7 хувиар нэмэгдэх тооцоолол гарчээ.

Трамвайн  систем нь дэлхийн олон хотод  бусад их багтаамжийн нийтийн тээврийн хэрэгслүүд болох метро,  BRT буюу тусгай замын автобус, болон автобусны системтэй хослон ажиллаж байна.

Хүн ам ихтэй улс орнууд трамвайн системийг техник технологийн хувьд шинэчлэн сайжруулж, илүү ухаалаг, автоматжуулсан хэлбэрт шилжүүлсээр байна гэж Зам тээврийн хөгжлийн яам мэдээлэв.