“GCC ACADEMY” академиас өнгөрсөн бямба гарагт бүтэн өдрийн сургалт зохион байгуулж, санхүүгийн бус салбарын хүмүүст үнэ төлбөргүй зөвлөгөө, мэдээлэл өглөө. Сургалтаар эдийн засагч Б.Энхбаяр энэ оны улсын төсвийн тодотгол, 2025 оны улсын төсвийн төслийг танилцууллаа.

Тэрээр энэ оны улсын төсвийг гэнэт тодотгож, 27 их наяд төгрөгийн зардлыг 3 их наяд төгрөгөөр нэмсэн нь макро эдийн засгийн тогтвортой байдалд харшилсан гэв. Мөн БНХАУ-д үл хөдлөх хөрөнгийн борлуулалт өмнөх оныхоос 30 хувиар буурсан, ОХУ шинэ төмөр зам барьж, ирэх онд БНХАУ руу 10 сая тонн нүүрс нэмж борлуулахаар зэхэж байгааг, манай улсын зээлжих зэрэглэл арван жилийн дараа ахисан нь сайн мэдээ боловч Монгол Улс хөрөнгө оруулалтын бус зэрэглэлд багтсан хэвээр, түүхий эдийн үнийн хэлбэлзэл ирэх онуудад эрсдэл үүсгэж болзошгүйг анхааруулав.
         
Дараа нь "Голомт Капитал"-ын шинжээчид эдийн засгийн сүүлийн үеийн мэдээллийг танилцуулж, ирэх оны ханшийн хэлбэлзэл, хөрөнгө оруулагчийн сэтгэл зүй, хөрөнгийн зах зээл, хувьцаа сонгох аргачлал, компаниудын санхүүгийн тайланг хэрхэн унших талаар дэлгэрэнгүй танилцуулав.

Манай улсын хөрөнгийн зах зээлийн үнэлгээ сүүлийн жилүүдэд хурдацтай нэмэгдэн, 11 их наяд төгрөгт хүрчээ. ТОП 20 индекс энэ онд 24 хувиар өсөж, түүхэн дээд ханшаа шинэчилсэн байна.

Дотоодын хөрөнгийн зах зээлд хэзээ хөрөнгө оруулахад илүү тохиромжтой вэ гэвэл жил бүрийн дөрөв, тавдугаар саруудад хувьцааны үнэ буурах хандлагатай байдаг гэв. Харин АНУ-ын хөрөнгийн зах зээлээс хувьцаа авахад найм болон есдүгээр сар илүү тохиромжтой гээд Гайхамшигт долоо гэгддэг, Амазон, Мета, Гүүгл, Нвидиа гэх мэт технологийн компаниудын хувьцааны сүүлийн жилүүдийн хөдөлгөөн, ирэх жилүүдийн таамаглалыг танилцууллаа.