Орос цэргүүд Украины цахилгаан станцууд, эрчим хүчний системүүдийг онилох болсноор тус улсад цахилгааны тасалдал үргэлжилсээр байна. Гэвч энэ нь хүнд өвтэй хүмүүст илүү хүнд нөлөөлж байна.

Татьяанагийн хүү төрөлхийн хөгжлийн бэрхшээлтэй. Хүү амьсгал авах, хоол идэх, эм уухад ч цахилгаанаар ажилладаг тоног төхөөрөмжүүд хэрэгтэй. Тэд боомт хот Одессад амьдардаг. Одоо тэрээр бензинээр ажилладаг генератор ашиглаж байна. Генераторыг байнга дүүрэн байлгах, зургаан цаг тутамд зогсоон, хөргөх ёстой. Дайн энэ гэр бүлийн амьдралыг маш хэцүү болгожээ.     

“Хүүгийн бие муудахад түргэн тусламж дууддаг. Заримдаа 30 минут, заримдаа цагийн дараа эмч ирдэг. Хүү маань хүчилтөрөгчгүй болбол үхнэ. Нэг удаа хүүгийн царай хөх өнгөтэй болчихсон. Зарим өдөр бид 12 цаг цахилгаангүй байдаг ” гэж ээж нь ярьжээ.     

Украинд цахилгаан тасардаг хугацаа улам уртасч, дайнаас алслагдсан нутагт ч цахилгаангүй болдог болжээ. Энэ сарын  6-нд болсон агаарын дайралтын дараа Украины баруун хойд бүс болох Сумигийн 100 мянган оршин суугчийн цахилгаан тасарчээ. Зарим  газар ус мөн тасардаг.  

Украин сүүлийн гурван сард 9 гигаваттын эрчим хүч үйлдвэрлэх хүчин чадлаа алдсан гэж тус улсын “Украинэрго” компаниас мэдээлжээ. Энэ тус улсын үйлдвэрлэдэг нийт эрчим хүчний 1/3-тэй тэнцэнэ. Украины төрийн өмчит бүх дулааны болон усан цахилгаан станцуудыг оросууд пуужин, дроноор устгажээ.   

Эх сурвалж: BBC