ХӨСҮТ-өөс Томуу, томуу төст болон улаанбурхан өвчний нөхцөл байдлын талаар мэдээлэл өглөө.

Өнөөдөр улаанбурхан өвчний зөөвөрлөгдөн орж ирсэн тав дахь тохиолдол лабораториор батлагдсан хэмээн мэдээлсэн. Энэ өвчний товлолт вакцины нэгдүгээр тунг 9 сартайд, хоёрдугаар тунг 2 настайд хийдэг бөгөөд вакцинд хамрагдаагүй, өмнө нь өвчилж байгаагүй хүмүүс тусах эрсдэл хамгийн өндөр.

Иймд баярын өдрүүдэд 9 сар хүрээгүй хүүхдээ аль болох олон хүнтэй газар удаан байлгахгүй байхыг зөвлөлөө.

Мөн улаанбурхан өвчний дэгдэлт Зүүн өмнөд Азийн орнуудад өндөр байгаа тул Вьетнам зэрэг орон руу аялахаар төлөвлөсөн бол ХӨСҮТ-ээс өгсөн зөвлөмжүүдийг дагахыг сануулсан юм.

Батлагдсан тохиолдлууд бүгд зөөвөрлөгдөн орж ирсэн бөгөөд вакцин хийлгээгүй, өмнө нь энэ өвчнөөр өвчилж байгаагүй хүмүүс аж.

Мөн сүүлийн долоо хоногуудад менингококкт халдварын тохиолдлууд бүртгэгдээгүй ч энэ жил дэгдэлтийн жил таарч буй тул халдвар хамгааллын дэглэм сайтар сахихыг сануулав. Ялангуяа гуравдугаар сард энэ халдварын дэгдэлтийн оргил үе таарч буй.

Тиймээс баярын бэлтгэл хийх, баярын өдрүүдийг тэмдэглэн өнгөрүүлэхдээ

• олон хүн цугларсан газарт аль болох бага насны хүүхдийг дагуулж явахгүй байх,
• золгохдоо бага насны хүүхдийг үнсэхгүй байх,
• амны хаалт зүүж, гараа халдваргүйтгэх,
• ам, хоолойг давс, нимбэг, сод, саримсны уусмалаар ээлжлэн зайлах,
• гэртээ агаар сэлгэлт сайтар хийхийг зөвлөж байна.