Гэр бүл, хөдөлмөр, нийгмийн хамгааллын яамны Төрийн нарийн бичгийн дарга Л.Мөнхзул БНСУ-д ажиллаж, Сөүлийн гэр бүлийн төвийн үйл ажиллагаатай танилцлаа.

Монгол Улсын Засгийн газрын 2024-2028 оны үйл ажиллагааны хөтөлбөрт Гэр бүл төвтэй нийгмийн хамгааллын бодлого хэрэгжүүлэхээр Гэр бүл, хөдөлмөр, нийгмийн хамгааллын яамтай болсон.

Энэ хүрээнд гэр бүлийг дэмжих төвүүдийг байгуулахаар загварыг нь гаргаж байна. БНСУ нь Гэр бүл, эмэгтэйчүүдийн яамтай бөгөөд энэ чиглэлээр БНСУ бол хамгийн сайн жишиг болсон улс юм.

Гэр бүл төвтэй бодлого хэрэгжүүлэхдээ "Аавуудыг хөтөлбөр"-ийг чухалчилж хэрэгжүүлдэг аж. Нярай хүүхэдтэй болон сургуулийн насны хүүхэдтэй аавууд зэргээр төрөлжүүлж, харилцааны хөтөлбөрүүдийг түлхүү хэрэгжүүлдэг. 

Мөн эхнэр, нөхрийн эрүүл харилцааг эрхэмлэх, бүх хүүхдэдээ эрх тэгш боловсрол олгох, хүний эрхийн мэдрэмж, хүчирхийллээс урьдчилан сэргийлэх сургалт, сэтгэлзүйн зөвлөгөөг гэр бүлийн гишүүн бүрд зориулан хэрэгжүүлдэг гэнэ.

Үүнд иргэд нь сайн дураараа, 100 хувь үнэ төлбөргүй хамрагддаг. Мөн БНСУ-д 74 мянга орчим олон соёлт гэр бүл байдаг. Тэр гэр бүлүүдээ ч сургалт, зөвлөгөөнд түлхүү хамруулдаг хэмээн Гэр бүл, хөдөлмөр, нийгмийн хамгааллын яамнаас мэдээллээ.