Эдийн засаг, хөгжлийн яамнаас Үндэсний Худалдаа аж үйлдвэрийн танхимтай хамтарсан “Улсын хөгжлийн 2026 оны төлөвлөгөө”-ний олон талт хэлэлцүүлэг өчигдөр болжээ.

Тус яамны Хөгжлийн нэгдсэн бодлого, төлөвлөлтийн газрын дарга Ц.Эрдэнэбат “Улсын хөгжлийн 2026 оны төлөвлөгөө”-ний төсөл, хөгжлийн бодлого, төлөвлөлтийн талаар танилцуулсан байна. 

Бизнесийн орчныг сайжруулахад төр хувийн хэвшлийн хамтын ажиллагааг дэмжин ажиллах, цаашид хөгжлийн бодлого, төлөвлөлтөд хувийн хэвшлийн оролцоог нэмэгдүүлэхэд хамтран ажиллах талаар мэдээллээ.

“Монгол Улсын хөгжлийн 2026 оны төлөвлөгөөний төсөл”-ийг ”Хүн төвтэй” хөгжлийн үзэл санаанд нийцүүлэн бизнесийн орчны шинэчлэл, чөлөөт эдийн засгийг цогцлоох”-ыг зорьж, “Бүсчилсэн хөгжил”, “Хүний хөгжил”, “Эдийн засаг”, “Хүний эрхийг дээдэлсэн засаглалын бодлого” гэсэн дөрвөн үндсэн бодлогын тэргүүлэх чиглэлийн хүрээнд боловсруулжээ.

Хэлэлцүүлэгт бизнес эрхлэгч, аж ахуйн нэгж,  мэргэжлийн холбоодын 40 гаруй хүн оролцож саналаа хэлсэн байна.

Эх сурвалж: Эдийн засаг, хөгжлийн яам